رێخستنا لێبۆرینێ یا ناڤنەتەوەیی «ئه‌منستی ئنتەرناشینال» دەربارێ خوەپێشاندانێن ڤێ داویێ یێن ل ئیرانێ و رۆژھلاتا کوردستانێ دە راپۆرەک بەلاڤکر و تێده ئه‌شكه‌ر كریه كو د خوەپێشاندانان دە، 304 کەس ھاتنە کوشتن، خه‌ته‌را ده‌ركه‌تنا جه‌زایێ مرنێ ژی ژبۆ رێبه‌رێن بنچاڤكری یێن خوه‌پێشاندانان هه‌یه.
رێخستنا لێبۆرینێ یا ناڤنەتەوەیی «ئه‌منستی ئنتەرناشینال» دەربارێ خوەپێشاندانێن ڤێ داویێ یێن ل ئیرانێ و رۆژھلاتا کوردستانێ راپۆرەک بەلاڤکر و ل گۆر وێ راپۆرێ، تەنێ د 15 و 18 مه‌ها رابووری دە، د خوەپێشاندانێن ل ئیران و رۆژھلاتێ کوردستانێ، 304 کەس ھاتنە کوشتن و ب ھەزاران کەس ژی بریندار بوونە.
د راپۆرا رێخستنێ دە تێ گۆتن کو ل گۆر شاھدێن بوویەرێ، دەولەتا ئیرانێ ب پیلانەکێ رێ ل مرۆڤان گرتیە کو بەھسا بوویەران بکن.
ھەروھا رێخستنێ دا زانین کو ل گۆر دیمەن و شاھدێن بوویەرێ، ھێزێن ئیرانێ ب ئاوایەک راستە راست گوللـە بەردانە خوەپێشاندەران.
ھاتە گۆتن کو د دەما خوەپێشاندانان دە ب ھەزاران خوەپێشاندەر، رۆژنامەڤان، خوەندەکار و چالاکڤانێن مافێ مرۆڤان ھاتنە بنچاڤکرن.
ل گۆری راپۆرا ئه‌منستیێ د خوەپێشاندانان دە 180 کەس، ب ھێجەتا رێبەرییا خوەپێشاندانان ھاتنە بنچاڤکرن، ھەروھا ھات دەستنیشانکرن کو مەترسیا جەزایێ مرنێ ژی ل سەر ڤان کەسانە ھەیە.
ئه‌منستی ئه‌شكه‌ره كریه، دەولەتا ئیرانێ خه‌تا ئینتەرنێتێ قوتکریه و ھەولدا رێ ل بەر بەلاڤبوونا دیمەن، وێنە و نووچەیێن خوەپێشاندانان بگرە.
ب گشتی ٩ رۆژ ل ئیرانێ ئینتەرنەت ھاتە قوت کرن، هه‌ر چه‌ند كو مه‌هه‌ك ل سه‌ر خوه‌پێشاندانێن ئیرانێ ده‌رباس بوویه، لێ به‌لێ هێشتا ئۆپه‌راسیۆنێن بنچاڤكرنێ ل وی ولاتی كاره‌كێ به‌رده‌وامه.
