په‌كه‌كێ پلانا گه‌ریلایان بۆ سالا 2020ێ ئه‌شكه‌ره‌ كر

په‌كه‌كێ پلانا گه‌ریلایان بۆ سالا 2020ێ ئه‌شكه‌ره‌ كر

داخویانیێن داویێ یێن «باهۆز ئه‌ردال» و راستییا وان

فه‌رماندارێ بریارگه‌ها ناڤه‌ندییا پاراستنا گه‌ل د. باهۆز ئه‌ردال، ژ بۆ رادیۆیا ده‌نگێ ولات داخۆیانی دا ل ده‌ربارا قۆناغێن شه‌رێ گه‌ریلایان و هه‌روه‌ها پلانێن سالا 2020ێ، چه‌ندین نرخاندن كرن.

 باهۆز ئه‌ردال، د نرخاندنێن خوه‌ دا دبێژیت‌: «ئۆپه‌راسیۆنێن سوپایێ توركیا بێ ئه‌نجام ماینه‌، سوپایێ توركیا نها تنێ د كاریت بانگه‌شه‌یان بكه‌ت‌، ژ به‌ر كو ئێدی وان شیانێن گه‌هشتنێ بۆ جهێ گه‌ریلایان نه‌مایه‌ و نه‌شێن بگه‌هنه‌ گه‌ریلایان».

هه‌ڤده‌م باهۆز ئه‌ردال د گۆتارا خوه‌ دا‌ دبێژیت: «ژ به‌ر كو ئێدی سوپایێ توریكا نه‌شێن بگه‌هن گه‌ریلایان، ئه‌و نزانن گه‌ریلا ل چ ده‌ره‌كێ نه‌ و دچنه‌ كیرێ، ئاگاهی ژی ل سه‌ر ب ده‌ست وان ناكه‌ڤن، سوپایێ توركیا یێ داگیركه‌ر كه‌فتییه‌ د ڤالاتییه‌كه‌ مه‌زن دا، ئه‌ڤ چه‌نده‌ ژی ب سه‌ركه‌فتنه‌كا مه‌زن ژ بۆ گه‌ریلایان دهێت هه‌ژمارتن و گه‌ل ژی گه‌هشتیه‌ وێ رامانێ كو سوپایێ بن كه‌تییه‌».

لێ به‌لێ ئه‌ڤ نرخاندنێن باهۆز ئه‌ردال چه‌ند راستن و چه‌ند جهێ گومانێ نه‌؟، ژ به‌ر كو گه‌ریلا ل 4 سالێن دوماهیێ بێ رۆل ماینه‌ و د گه‌ل دوباره‌یه‌كێ دژین، به‌لكو ئێدی هه‌ر مه‌حاله‌ گه‌ریلا بكه‌ڤنه‌ د ره‌وشا هێرشبرنێ دا و زێده‌تر ب مخابنی ڤه‌ هه‌ر نه‌شێت خوه‌ ژی بپارێزت‌ و د سه‌ر ڤێ را په‌كه‌كێ ته‌رزێ خوه‌ یێ گه‌ریلاتیێ دوباره‌ دكه‌ت.

ژ سالێن 2000ێ و هێرڤه‌ و دگه‌ل پێشكه‌فتنا ته‌كنۆ‌لۆژیا شه‌ری، ئێدی مۆدێلا شه‌ر كرنا ب كلاشینكۆفێ ل دژی ده‌وله‌تێ نه‌مایه‌، ژ به‌ر كو پیشه‌سازیا چه‌كی و چه‌كێن پێشكه‌فتی ئێدی زێده‌تر پشت به‌ستنێ ل سه‌ر هێزا ته‌كنیكی دكه‌ن، نه‌ هێزا مرۆڤان و هه‌ژمارا وان، لێ مخابن په‌كه‌كه‌ ڤێ راستیێ نابینیت و ل سه‌ر هێزا به‌رخوه‌دانڤانیا گه‌نجێن كورد خه‌باتا خوه‌ دوباره‌ دكه‌ت‌.

پێدڤی ناكه‌ت ئێدی په‌كه‌كه‌ ژ بۆ ده‌مۆكرات كرنا توركیا د هه‌ر مه‌هه‌كێ دا‌ ب ده‌هان گه‌ریلایان بده‌ته‌ شه‌هید كرن

پێدڤییه‌ په‌كه‌كه‌ 2 راستیان قه‌بوول بكه‌ت‌:

یا ئێكێ: ئێدی چ مفا د شه‌رێ گه‌ریلا یێ مینا 35 سالێن رابووری نه‌مایه‌، ژ به‌ر كو بلا په‌كه‌كه‌ وێ هزرێ نه‌كه‌ت كو ئێدی چیا دگه‌ل ڤێ ته‌كنولۆژیا پێشكه‌فتی ژ بۆ ده‌وله‌تێ ئاسته‌نگ بیت، گه‌ریلایان ژی ل به‌رانبه‌ر شیانێن پاراستنا خوه‌ نابیت.

یا دوێ: پێدڤییه‌ په‌كه‌كه‌ جوداهیێ د ناڤبه‌را ئارمانج و ئالاڤان دا ببینیت و ژ بۆ ئارمانجا ده‌مۆكرات كرنا تركیێ، پێدڤی ناكه‌ت د هه‌ر مه‌هه‌كێ دا ب ده‌هان گه‌ریلایان بده‌ته‌ شه‌هید كرن، په‌كه‌كه‌ ب ڤی ئاوایی مافێ وێ نینه‌ گه‌نجێن كورد به‌رته‌رف بكه‌ت.

هه‌تا ل سه‌ر ڤان هه‌ردو خالان په‌كه‌كه‌ ره‌خنه‌یه‌كا وێره‌ك و درست ل خوه‌ نه‌كه‌ت، گۆتگۆتكێن وێ هه‌موو ژ ئاستا بانگه‌شێ ده‌رباس نابن.

باهۆز ئه‌ردال دبێژیت: «دوژمن وان خالێن كو هه‌ڤالێن مه‌ ب سالان به‌ری نها ب جهـ هێلاین، وه‌ها نیشان دده‌ت كو یێن نها نه‌، لێ یا راست ئه‌وه‌ كو ل وان كامپان تنێ گلێشێ هه‌ڤالان هه‌یه‌، وی گلێشی د سۆژن و ل سه‌ر وێ بانگه‌شێ دكه‌ن كو وان درب ل په‌كه‌كێ داینه‌»، یا راست ئه‌وه‌ كو ب مخابنی ڤه‌ نرخاندنێن باهۆز ئه‌ردال نه‌شێن وێ ره‌وشا ملله‌تێ كورد تێدا دژیت ب په‌چنیت.

ئیرۆ عه‌فرین برینداره،‌ سه‌رێ كانیێ و گرێ سپی برینداره‌، هه‌رۆژ گه‌لێن وان دمرن، مال و مولكێ وان دكه‌ڤن ده‌ستێ داگیركاران و ده‌ست درێژی ل سه‌ر ژنێن وان دهێت كرن، مخابن ئه‌ڤ بانگه‌شه‌یێن باهۆز و هه‌ڤالێن باهۆز دكه‌ن، ڤێ برینێ ده‌رمان ناكه‌ن‌، ل بوهارا سالا 2019ان و هێرڤه‌ سوپایێ توركیا كه‌تیه‌ د گه‌له‌ك جهێن په‌كه‌كێ دا ب تایبه‌ت ده‌ڤه‌رێن ب ناڤێ «هه‌رێمێن پاراستنا مه‌دیا».

28 سالان چیایێ شه‌كیف د ده‌ست په‌كه‌كێ دا بوو، لێ نه‌شیا 28 رۆژان بپارێزیت و دا ده‌ست تركیێ

په‌كه‌كه‌ ل سالا 1991ێ هه‌تا نها كو ده‌ما 28 سالانه‌ چیایێ شه‌كیف یێ خواكوركی د ده‌ست دا‌یه‌، وێ نه‌شیا 28 رۆژان وی چیایێ بپارێزیت و ئه‌و ده‌ڤه‌ر ژ بۆ سوپایێ توركیا به‌ردا، ل عه‌فرینێ و سه‌رێ كانیێ ژی ره‌وش ژ ڤێ جودا نینه‌، د سه‌ر وێ یه‌كێ را‌ كو ب هه‌زاران شه‌هید هاتن دان، لێ به‌لێ ئه‌نجام بنكه‌تن و رۆخاندنه‌كا‌ مه‌زن بوو.

ئه‌ڤه‌ ب سالانه‌ په‌كه‌كه‌ دبێژیت‌ گه‌له‌ك جهـ د ده‌ست من دانه‌ و كه‌س نه‌شێت بكه‌ڤیته‌ تێدا، لێ دیاره‌ كو ئه‌ڤ جهه‌ ژ ده‌ست وان هاتنه‌ ده‌رخستن، ل هه‌مان ده‌مێ ژی و ل گۆر ڤی ئه‌نجامی، هێژان په‌كه‌كه‌ ره‌خنه‌یان ل خوه‌ ناكه‌ت، پێدڤی بوو كو پشتی وان هنده‌ بوویه‌رێن دل سۆژ، په‌كه‌كێ ره‌خنه‌یه‌كا راست ل خوه‌ كربا، ل شوونا كو ڤێ بكه‌ت، هه‌ر وه‌ك به‌رێ بانگه‌وازیا به‌رخوه‌دانا ملله‌تی دكه‌ت و دبێژیت‌: «گه‌نج بلا ته‌ڤلی گه‌ریلا ببن».

پێدڤییه‌ ئێدی گه‌ل رێ نه‌ده‌ت په‌كه‌كێ كو كێماسیێن خوه‌ یێ سیاسی و له‌شكری بێخیته‌ سه‌ر ژیانا گه‌نجێن كورد

 ب گۆتنه‌كا دی، په‌كه‌كه‌ خه‌باتا خوه‌ یێ دوباره‌ كری یا 35 سالان ل سه‌ر ملله‌تی فه‌رز دكه‌ت‌، ل ڤێرێ ئه‌ركێ ئه‌ساس دكه‌ڤیته‌ سه‌ر مللێ گه‌ل، ئێدی گه‌ل پێدڤییه‌ باوه‌ریێ ب ڤان پرۆباگندێن په‌كه‌كێ نه‌ ئینیت‌، گه‌لێ كورد، ناسنامه‌یا خوه‌، ولاتێ خوه‌، زمانێ خوه‌ و چاندا خوه‌ و ب گشتی نرخێن خوه‌ یێن نه‌ته‌وه‌یی بپارێزیت، چ گه‌نجێن كورد ژ بۆ ده‌مۆكرات كرنا توركیا نه‌هێن قوربانی كرن، گه‌ل پێدڤی ب ڤێ نینه‌، گه‌لێ كورد پێدڤییه‌ مرنێ نۆرمال نه‌بینیت‌، ل شوونا مرنێ پیرۆز ببینیت‌، پێدڤییه‌ ژیانێ پیرۆز بكه‌ت‌، ئیجازێ نه‌ده‌ته‌ په‌كه‌كێ كو كێم و كاسیێن خوه‌ یێن سیاسی و له‌شكری ل سه‌ر ژیانا گه‌نجێن كورد ب ڤه‌شێریت.

پوستێن ھەمان بەش