ب سه‌ده‌ما ئێریشێن به‌رده‌وام یێن رژێما سووریێ و رووسیا فه‌ده‌رال،  ژ دوهـ رۆژا شه‌مبی 25 هزار سڤیلێن دن یێن ئدلبێ مالێن خوه‌ ب جی هێلان و به‌ر ب خه‌تا سینۆرێ دگه‌ل تركیێ ره‌ڤیان.

ل گۆری سازیێن مافێن مرۆڤان ل سووریێ، ب سه‌ده‌ما ئێریشێن به‌رده‌وام یێن باله‌فرێن جه‌نگ یێن رژێما سووریێ و رووسیا فه‌ده‌رال ل سه‌ر ناڤچه‌یێن كێم كرنا ئالۆزیێ یێن پارێزگه‌هیا ئدلبێ، 25 هزار سڤیلێن دن مالێن خوه‌ ب جی هێلان و به‌ر ب خه‌تا سینۆرێ ل ناڤبه‌را سووریێ و تركیێ كۆچبه‌ر بوون.

باله‌فرێن ره‌ژیما سووریێ دوهـ ئێریشا هه‌ژماره‌كه‌ گوندێن ئدلبێ كرن، هه‌ر كێم 28 كه‌س هاتن كوشتن و بریندار كرن، ئیرۆ ژی بۆردۆمان چێبوویه‌ و 5 سڤیلێن دن ژیانا خوه‌ ووندا كر.

ل گۆر سازیێن مافێن مرۆڤان، ژ ده‌ستپێكا مه‌ها رابووری هه‌یا نها، هه‌ری كێم 205 هزار سڤیلێن ئدلبێ و ده‌ردوورا وێ ناڤچه‌یێن خوه‌ ب جی هێلانه‌ و كۆچبه‌ری خه‌تا سینۆر بوونه‌، ل ده‌ما ساله‌كێ ژی زێده‌تر ژ ملیۆن سڤیلان كۆچبه‌ر بوونه‌.