په‌ژراندنا قانوونا هلبژارتنێ زه‌نگا خه‌ته‌ره‌كه مه‌زنه
پارلمه‌نا ئیراقێ ئیرۆ ژ بۆ په‌ژراندنا قانوونا هلبژارتنان جڤیا و ل گه‌ل ده‌ستپێكرنا ده‌نگدانێ، پارلمه‌نته‌رێن كورد هۆلا جڤینێ ب جی هشتن و مادده‌یێن 15 و 16 بێ ره‌زامه‌ندیا وان هاتن په‌ژراندن، كورد ژی ڤێ یه‌كێ ب خه‌ته‌ره‌كه مه‌زن دبینن.
پارلمه‌نا ئیراقێ ئیرۆ رۆژا سێشه‌می 24/12/2019ان ل ده‌ربارا قانوونا سه‌راست كری یا هلبژارتنێن ئیراقێ جڤیا و بێ ره‌زامه‌ندییا پارلمه‌نته‌رێن كورد، مادده‌یێن 15 و 16 كو ناكۆكی ل سه‌ر هه‌نه هاتن په‌ژراندن و پارلمه‌نته‌رێن كورد هۆلا جڤینێ یا پارلمه‌نتۆیێ ب جی هشتن.
مادده‌یا 15 یا قانوونا هلبژارتنێن ئیراقێ تایبه‌ت ب بازنه‌یێن هلبژارتنان ڤه كو ل سه‌ر ئه‌ساسا ناڤچه‌یان هاتیه دانان كو ل هه‌ر ناڤچه و پارێزگه‌هه‌كێ یه‌ك بازنه نابه به‌لكو وێ گه‌له‌ك بازنه هه‌بن، هه‌موه‌خت مادده‌یا 16ێ ژی گرێدای كۆتایا ژنانه كو رێژه‌یا 25% ژ بۆ ژنێ هاتیه ده‌ست نیشان كرن.
ل گۆر زانیاریێن پێگه‌ها داركا مازی پارلمه‌نته‌رێن كورد ل گه‌ل ده‌ستپێكرنا ده‌نگدانێ ل سه‌ر قانوونا هلبژارتنێ ژ هۆلا پارلمه‌نتۆیێ ده‌ركه‌تن، لێ به‌لێ رێژه‌یا قانوونی یا روونشتنێ نه‌هات شكاندن و ده‌نگدان ل سه‌ر وان مادده‌یێن ناكۆك هات كرن.
پارلمه‌نته‌رێن كورد ئه‌شكه‌ره كرن كو مادده‌یێن 15 و 16 ل سه‌ر ئه‌ساسا زۆرینه‌یا ده‌نگان هاتن په‌ژراندن، نه ل سه‌ر ئاساسا به‌رژه‌وه‌ندیا ئالییان، ئه‌ڤ یه‌ك ژی وێ زرارێ ل حزبێن بچووك بكه.
پارلمه‌نا ئیراقێ د جڤینا خوه یا حه‌فتییا رابووری ده، ژ سه‌رجه‌ما 50 مادده‌یێن قانوونا هلبژارتنێ، 14 مادده په‌ژراندن و ئیرۆ ژ بۆ په‌ژراندنا مادده‌یێن مایی جڤیا، كوردان تێبینی ل سه‌ر مادده‌یێن 15 و 16 هه‌بوو، ژ به‌ر كو ئه‌و دبینن كو زیان دێ ژ بچووكرنا بازنه‌یێن هلبژارتنان هه‌به.
لوژیكا زۆرینه و كوشتنا هه‌ڤپشكیێ
پارلمه‌نته‌رێن كورد ل پارلمه‌نتۆیا ئیراقێ نه‌رینا وان وهایه كو ب په‌ژراندنا مادده‌یێن 15 و 16 یێن قانوونا هلبژارتنان، خه‌ته‌ره‌كه مه‌زن دكه‌ڤه سه‌ر پرۆسه‌یا سیاسی، ژ به‌ر كو ب كوشتن ژ بۆ وێ هه‌ڤپشكیێ تێ هه‌ژمارتن ئه‌وا ژ سالا 2003ێ ولات پێ تێ برێڤه‌برن.
سه‌ركرداتییا هه‌رێما باشوورێ كوردستانێ ژ ده‌ستپێكا ئاڤابوونا ئیراقا فه‌ده‌رال، ته‌كه‌زی ل سه‌ر پابه‌ندبوونا ب ده‌ستوورا ولات كرییه و هه‌موه‌خت هه‌ڤپشكیێ د رێڤه‌برنا ولات ده، لۆژیك و سیاسه‌تا زۆرینه ژی ب هه‌موو ئاوایه‌كی ره‌ت كرییه و دژ راوه‌ستایه.
پارلمه‌نته‌رێن كوردستانێ ئه‌شكه‌ره كرن، كوالیسیۆنێن كوردستانی ل پارلمه‌نتۆیا ئیراقێ وێ بجڤن و هه‌لوه‌سته‌كێ ل سه‌ر ده‌ربازكرنا مادده‌یێن 15 و 16 یێن قانوونا هلبژارتنێ بێ ره‌زامه‌ندییا كوردان وه‌ربگرن.
