ره‌وش ل ئیراقێ خه‌ته‌ره‌ جه‌نگه‌گه‌ دن د رێ ده ‌یه‌

به‌ری ب داوی بوونا سالا 2019ان، ئه‌مه‌ریكایێ گورزه‌كه‌ ب باندۆر ل به‌رژه‌وه‌ندیێن ئیرانێ ل ئیراقێ و سووریێ خست، وه‌ختا كو ناڤه‌ندێن یه‌كینه‌یێن حزبوللا یا ژ بال ئیرانێ ڤه‌ تێ پشته‌ڤانی كرن مۆشكه‌ باران كری، ئه‌ڤ ئێریش نه‌ ته‌نێ لێدانا بنگه‌هه‌كه‌ میلیشیایێن ئیرانێ یه‌، لێ ب ده‌رباس بوونا هه‌ڤركییا ئه‌مه‌ریكا و ئیرانێ ل سه‌ر خاكا ئیراقێ ژ بۆ قۆناغا شه‌ر و جه‌نگێ تێ حه‌ساب كرن.

ئێڤارا رۆژا یه‌كشه‌می 29/12/2019ان ئه‌مه‌ریكایێ 5 ناڤه‌ندێن یه‌كینه‌یێن حزبوللا كو ژ بال ئیرانێ ڤه‌ تێن پشته‌ڤانی كرن، ل رۆژئاڤا ئیراقێ و هه‌ر وها ل سووریێ بۆردۆمان كرن، 3 ناڤه‌ند ل ئیراقێ و 2 ل سووریێ، 25 چه‌كدارێن وێ میلیشایێ هاتن كوشتن و پێتر ژ 50 چه‌كدارێن دن بریندار كه‌تن.

ئه‌مه‌ریكایێ ئه‌ڤ هه‌نگاڤ ئاڤێت پشتی ل دو مه‌هێن رابووری پێتر ژ 10 جاران، میلیشایێن گرێدای حه‌شدا شه‌عبی ل ئیراقێ ل به‌رژه‌وه‌ندیێن ئه‌مه‌ریكایێ خستی، داوی جار ئاڤێتنا مۆشه‌كێن كاتیۆشا بۆ بنگه‌ها سه‌ربازی یا ب ناڤێ كه‌ی وه‌ن ل كه‌ركووكێ كو تێده‌ زرارێن جانی ب هێزێن ئه‌مه‌ریكایێ كه‌تنه‌.

پشتی ئێریشا سه‌ر ناڤه‌ندێن حزبوللا، ئه‌مه‌ریكایێ داخو‌یانی دا و ئه‌شكه‌ره‌ كر، وان ئێریشه‌كه‌ سه‌ركه‌تی پێكانی و دربه‌كه‌ مه‌زن ل ئیرانێ خست، لێ نه‌ گۆ كو ئه‌ڤ ئێریش دێ یا داویێ به‌ به‌لكو هنه‌ك رێكارێن دنێن هه‌ری دژوار وێ د رێ ده‌ بن.

كۆمارا ئیسلامی یا ئیرانێ ب رێیا میلیشیایێن گرێدای خوه‌ شه‌ر ل ولاتێن سووریێ و ئیراقێ دكر، هه‌ر ژ ده‌ستپێكا سالا 2019ان پێگه‌ها وێ ل سووریێ ژ به‌ر چه‌ند سه‌ده‌مه‌كان لاواز بوو، ب تایبه‌ت كو د ڤێ سالێ ده‌ ئیسرائیلێ و ئه‌مه‌ریكایێ چه‌ندین جاران پێگه‌هێن میلیشیایێن ئیرانێ ل سووریێ هه‌ده‌ف كرن، هه‌ر چه‌ند كو وێ هه‌ول د دان سووری ژ ده‌ست نه‌چه‌ لێ به‌لێ ئه‌ڤ یه‌ك چێبوو، پشتره‌ وێ هه‌ول دان ل ئیراقێ پێگه‌هـ و باندۆرا خوه‌ بهێز بكه‌.

ئه‌مه‌ریكایێ ژ مه‌ها گولانا سالا 2018ان جه‌زا ل سه‌ر ئیرانێ دانان، پشتره‌ ل مه‌ها 11 یا هه‌مان سالێ جه‌زایێن هه‌ری دژوار ل سه‌ر كه‌رتا په‌ترۆلا وێ دانان و گۆ كو ئه‌وێ داهاتا په‌ترۆلا ئیرانێ تونه‌ بكه‌ و هشیاری دا هه‌ر ولاته‌كێ بازرگانیا په‌ترۆلێ ل گه‌ل بكه‌، یا راست ئه‌مه‌ریكایێ ئه‌ڤ یه‌ك كر و ئیران كو بكاربكه‌ باندۆرا جه‌زایێن ئه‌مه‌ریكایێ ل سه‌ر خوه‌ هنه‌كی سڤك بكه‌، ده‌ست ب یاریه‌كه‌ قرێژ ل ناڤچه‌یێ كر ب تایبه‌ت ل ئیراقێ.

ژ داوییا سالا رابووری ئیرانێ جه‌نگه‌كه‌ سیاسی، ئابووری، جه‌ماوه‌ری و ل ڤێ داویێ سه‌ربازی ل ئیراقێ دا مه‌شاندن، وه‌ختا چه‌ندین جاران ل دو مه‌هێن رابووری ب رێیا میلیشیایێن خوه‌ بنگه‌هێن ئه‌مه‌ریكایێ هه‌ده‌ف كرین، ئه‌مه‌ریكایێ ژی ڤێ جارێ بێده‌نگی هلنه‌بژارت و به‌رسڤه‌كا زه‌لال و ئه‌شكه‌را دا ئیرانێ و گۆ كو ئه‌ڤ جارا داویێ نابه‌، به‌رسڤێن دژوارتر وێ د رێ ده‌ هه‌بن.

ئه‌ڤ یه‌ك ژی ئیراقێ به‌ر ب خه‌ته‌رێ دبه‌، ژ به‌ر كو ترس هه‌یه‌ ببه‌ مه‌یدانا جه‌نگا ئه‌مریكا و ئیرانێ، زرارا وێ ژی ته‌نێ دێ ژ بۆ ئیراقێ به‌.

ئه‌مه‌ریكایێ چه‌ندین به‌هانه‌ ژ بۆ لێدانا ناڤه‌ندێن حزبوللایێ هه‌نه‌، هه‌ر چه‌ند كو ئه‌ڤ میلیشیایه‌ ل سه‌ر ئیرانێ تێن حه‌ساب كرن، لێ به‌لێ سه‌ده‌ما سه‌ره‌كه‌ ئه‌ڤ میلیشیایه‌ د لیستا ته‌رۆرێ یا ئه‌مریكایێ ده‌ جی دگره‌ و ئه‌مه‌ریكا وان ب ئه‌نجامده‌رێن ئێریشێن جودا یێن ڤان 2 مه‌هێن رابووری حه‌ساب دكه‌.