چاره‌نڤیسا خه‌زعه‌لی دێ وه‌كه‌ یێ سوله‌یمانی به‌

ویلایه‌تێن یه‌كبوویی یێن ئه‌مه‌ریكایێ راگهاند كو ناڤێن سه‌ركرده‌یێن رێخستنا ب ناڤێ عه‌سائب ئه‌هلولحه‌ق قه‌یس خه‌زعه‌لی و برایێ وی له‌یس خه‌زعه‌لی كه‌تنه‌ د لیستا تایبه‌تا ته‌رۆریستێن ده‌ست نیشان كری ده‌.

وه‌زاره‌تا كارێن ده‌رڤه‌ یا ئه‌مه‌ریكایێ د به‌یانه‌كێ ده‌ ئه‌شه‌كه‌ره‌ كر كو وان رێخستنا ب ناڤێ عه‌سائب ئه‌هلولحه‌ق ئه‌وا قه‌یس خه‌زعه‌لی سه‌رۆكتیا وێ دكه‌، خستن د ناڤ لیستا ته‌رۆریستێن بیانی ده‌، هه‌موخت سه‌رۆكێ وێ رێخستنێ قه‌یس خه‌زعه‌لی و برایێ وی له‌یس خه‌عه‌لی ژی، خستن د لیستا ته‌رۆریستێن ناڤنه‌ته‌وه‌یی یێن ده‌ست نیشان كری ده‌.

هه‌ر وها دا زانین، ژ به‌ر كو رێخستنا عه‌سائب ئه‌هلولحه‌ق و رێبه‌رێن وێ ب ئیرانێ ڤه‌ گرێداینه‌ و كار بۆ ئه‌جیندایێن ئیرانێ و لاواز كرنا پێگه‌هـ و سه‌روه‌رییا ئیراقێ دكن، ئه‌مه‌ریكایێ ئه‌ڤ هه‌نگاڤ ئاڤێتییه‌.

وه‌زاره‌تا كارێن ده‌رڤه‌ یا ئه‌مه‌ریكایێ ته‌كه‌ز كریه‌ كو ئه‌و دێ دژوارترین جه‌زایان ب سه‌ر رێخستنا ئه‌هلولحه‌ق و رێبه‌رێن وێ ده‌ ب سه‌پینن، هه‌ر وها ل سه‌ر هه‌موو وان ئالییان كو هه‌ماهه‌نگیێ و هاریكاریێ ژ بۆ دكن.

د به‌یانا وه‌زاره‌تا كارێن ده‌رڤه‌ یا ئه‌مه‌ریكایێ ده‌ هاتییه‌: رێخستنا ئه‌هلولحه‌ق ژ ده‌ستپێكا ئاڤابوونا وێ ل سالا 2006ان 6 هه‌زار ئێریشێن جودا ل سه‌ر به‌رژه‌وه‌ندیێن ئه‌مه‌ریكایێ و هێزێن هه‌ڤپه‌یمانییا ناڤنه‌ته‌وه‌یی كرینه‌، وه‌كه‌ ئاڤێتنا مۆشه‌كێن كاتیۆشا و خستنا باله‌فره‌كا كۆپته‌ر یا به‌ریتانی و كوشتنا 5 له‌شكرێن ئه‌مه‌ریكایێ ل بنگه‌هێن كه‌ربه‌لایێ.

د به‌شه‌كا دن یا به‌یانێ ده‌ هاتییه‌ گۆتن كو چه‌كدارێن رێخستنا ئه‌هلولحه‌ق ژ ئالیێ فه‌یله‌قا قودس یا سوپایێ پاسدارێن ئیرانی ڤه‌ هاتنه‌ مه‌شقدان و هاریكارییا دارایی ژی ژ بۆ كرینه‌.