ب مۆشه‌كان ئێریش ل بالیۆزخانه‌یا ئه‌مه‌ریكایێ تێ كرن

ب مۆشه‌كان ئێریش ل بالیۆزخانه‌یا ئه‌مه‌ریكایێ تێ كرن

هه‌ژماره‌كه‌ مۆشه‌كێن كاتیۆشا ئێڤارا ئیرۆ ب زۆنا كه‌سك ل نێزی بالیۆزخانه‌یا ئه‌مه‌ریكایێ كه‌تن، ژێده‌را وان ئه‌شكه‌ره‌ نه‌بوویه‌ كانێ ژ كوده‌رێ هاتنه‌ ئاڤێتن.

ئێڤارا ئیرۆ رۆژا شه‌می 4/1/2020ێ هه‌ژماره‌كه‌ مۆشه‌كان ب زۆنا كه‌سك ل نێزی باره‌گه‌ها بالیۆزخانه‌یا ئه‌مه‌ریكایێ كه‌تن، هه‌ر چه‌ند كو ژێده‌را وان مۆشه‌كان نه‌هات زانین، لێ به‌لێ رێیا چوونێ ژ بۆ بالیۆزخانه‌یا ئه‌مه‌ریكایێ هات قه‌پات كرن.

هه‌موه‌ختا كه‌تنا مۆشه‌كان، هنه‌ك شاهد حالان ئه‌شكه‌ره‌ كرن كو هنه‌ك ته‌قین ژی ل ناڤه‌ندا باژارێ به‌غدایێ چێبوونه‌.

چاڤكانیێن ئه‌وله‌هییا ئیراقێ ژی ئه‌شكه‌ره‌ كرن كو هه‌ر ئیرۆ رۆژا شه‌می، 2 مۆشه‌كێن كاتیۆشا ب بنگه‌ها ئاسیمانی یا به‌له‌د ل باشوورێ پارێزگه‌ها سه‌لاحه‌ددینێ كه‌تنه‌ كو هێزێن ئه‌مه‌ریكایێ تێده‌ جی دگرن.

ئێریشا ئیرۆ یا سه‌ر زۆنا كه‌سك ل نێزی بالیۆزخانه‌یا ئه‌مه‌ریكایێ، هه‌موه‌ختا گه‌هشتنا هێزێن ئه‌مه‌ریكی بۆ پاراستنا باره‌گه‌ها بالیۆزخانێ تێ كو ل هه‌فتییا رابووری راستی ئێریشه‌كه‌ دژوارا میلیشیایێن حزبوللاهێ بوویه‌.

به‌رپرسه‌كێ ئارته‌شا ئه‌مه‌ریكایێ ئه‌شكه‌ره‌ كر كو 750 سه‌ربازێن وان ژ بۆ پاراستنا بالیۆخانه‌یا واشنتۆنێ گهانه‌ به‌غدایێ و ئه‌و هێز دێ پشته‌ڤانیێ ل هێزا مارینز كه‌ن كو ل رۆژێن رابووری ئه‌ركا پاراستنا بالیۆزخانێ وه‌رگرتنه‌.

بالیۆزخانه‌یا ئه‌مه‌ریكایێ ل به‌غدایێ ل رۆژا سێشه‌می یا رابووری راستی ئێریشا ئالیگرێن میلیشیایێ گرێدای ئیرانێ بوو، پشتی كو ل یه‌كشه‌می یا رابووری ئه‌مه‌ریكایێ هنه‌ك ناڤه‌ندێن حزبوللاهێ ل ئیراقێ و سووریێ بۆردۆمان كرین.

د به‌رسڤا ئیریشا سه‌ر بالیۆزخانێ ژی ده‌، ئه‌مه‌ریكایێ دوهـ رۆژا ئینی ئێریشا ترومبێلێن قاسم سوله‌یمانی فه‌رماندارێ فه‌یله‌قا قودس یا ئیرانێ و ئه‌بۆ مه‌هدی موهه‌ندس، جێگرێ سه‌رۆكێ ده‌سته‌یا حه‌شدا شه‌عبی كر و هه‌ر دو دگه‌ل هه‌ژماره‌كه‌ دن یا فه‌رماندارێن حه‌شدێ كوشتن.

كۆمارا ئیسلامییا ئیرانێ ژی ئه‌شكه‌ره‌ كریه‌، وان دێ به‌رسڤه‌كه‌ دژوار ژ بۆ كوشتنا سوله‌یمانی هه‌به‌.