دۆنالد ترامپ دیسان گەف ل ئیرانێ کرن

دۆنالد ترامپ دیسان گەف ل ئیرانێ کرن

دۆنالد ترامپ سەرۆکێ ویلایەتێن یەکبوویی یێن ئەمەریکایێ دیسان گەف ل ئیرانێ کرن و راگهاند ئەمێ 52 پێگەهێن ئیرانێ د هوندرێ وی ولاتی دە بکەین ئارمانج، ئەمەریکا تو گەفەکە دن قەبوول ناکەت

“گەر ئیران ئێریشێ بکە سەر هەر ئەمەریکیەکێ یان هەر بەرژەوەندیەکا ئەمەریکایێ، ئەمەریکا وێ 52 پێگەهان د هوندرێ ئیرانێ دە بکە ئارمانج”

دۆنالد ترامپ، سەرۆکێ ویلایەتێن یەکبوویی یێن ئەمەریکایێ سەرێ سبێ یا ئیرۆ رۆژا یەکشەمی 5ێ کانوونا دویەمین د حەسابا خوە ئا فەرمی د توویتەرێ دە سەبارەت گەفێن کۆمارا ئیسلامی یا ئیرانێ ژ بۆ تۆلهلدانا کوشتنا قاسم سولەیمانی فەرماندارێ فەیلەقا قودس یا سوپایێ ئیرانێ نڤیساند: “ئیران زۆر خەراب داخوەیانیا ددە لسەر ب ئارمانج کرنا بەرژەوەندیێن ئەمەریکا وەکە تۆلهلدانەک ل همبەر داوی ئانین ب رێبەرێ تەرۆریستان کو ئەمەریکا ئەو کوشتی و چەند کەسەکێن دن زۆر ب دژواری بریندار کری، خەلکەکێ زۆر کو ژ وان سەدان خوەپێشاندەرێن ئیرانی کو د ڤان نێزیکان دە تاکو ئەو د ژیانێ دە مابوو کوشتن”.

دۆنالد ترامپ د بەشەکە دن ئا توویتێن خوە دە ب ئاماژەپێکرن ب ئێریشا سەر بالیۆزخانەیا ئەمەریکا ل بەغدایێ ژ ئالیێ قاسم سولەیمانی ڤە نڤیساند: “وی پێش نها ئێرشی سەر بالیۆزخانەیا مە کر و خوە بەرهەڤ دکر کو جارەکە دن ئێرشی بکە سەر چەندین خالێن دن”.

دۆنالد ترامپ د داویا زنجیرە توویتێن خوە دە هشیاریەکە توند ددە دەسهەلاتدارێن کۆمارا ئیسلامی یا ئیرانێ و ب ئاماژە دان ب 52 بارمتەیێن بالیۆزخانەیا ئەمەریکا ل تەهرانێ کو ل رۆژا 4ێ تشرینا دویەمین یا سالا 1979ان ژ ئالیێ ئالیگرێن شۆرشا ئیسلامی یا ئیرانێ ڤە  هاتبوون دەستەسەر کرن نڤیساند: ” رێ بدن ڤێ وەکە هشیاریەکێ رابگەهینم کو گەر ئیران ئێریشی سەر ئەمریکیەکێ یان بەرژەوەندیەکا ئەمەریکا بکە، ویلایەتێن یەکبوویی یێن ئەمەریکا وێ ئێرشی 52 پێگەهێن د هندورێ ئیرانێ دە بکە، ئەو پێگە‌ه‌ ژی پێگەهێن بلند و گرنگن ژ بۆ ئیران و فەرهەنگا ئیرانێ، ئەو ئارمانج و ئیران ب خوە وێ زۆر ب لەز و دژواری وەرن ئارمانج کرن. ئەمەریکا ئێدی تو گەفەکە دن قەبوول ناکە!”.

هەروها ترامپ دەمەکێ کورت پێش نها د توویتەکێ دە راگهاند، ئەمەریکا 2 تریلیۆن دۆلار ل چەکێن هەری پێشکەفتی دە مەزاختینە کو ئەو چەک ژ باشترین چەکێن جیهانێ نە و گەر ئیران ئێریشی سەر پێگەهەکە ئەمەریکا یان ئەمەریکیەکێ بکە، ئەم وێ بێ دو دلی نووترین براند و جۆرێن چەکان بکار ئینین.

دۆنالد ترامپ هەر وها راگهاند، گەر ئیران بەردەوام بە ل ئێریشکرنە سەر مە، ب رەنگەک وها وێ بەرسڤا وان بدین کو تو جاران بەرسڤەکە ب ڤی ئاوایی نەدیتبە.