پارلامەنتۆیا ئیراقێ ئیرۆ وێ بجڤە و ئالیێن شیعە ژی ھەول ددن یاسایەکێ پەسەند بکن کو ھێزێن ئەمەریکایێ ژ ئیراقێ بێن دەرخستن.
رێخستنا بەدر کو هادی عامری سەرکرداتیا وێ دکە داخوازێ دکە، ئەو جڤین ب ئاوایێ ڤەکری برێڤە بچە.
تێ پێشبینیکرن بەشەکی زێدە ژ فراکسیۆنێن کوردستانی و بەشەک ژ سوننەیان دەنگ ژ بۆ دەرخستنا ھێزێن ئامەریکایێ ل ئیراقێ نەدن.
جڤینا ئیرۆ یا پارلامەنتۆیا ئیراقێ ژ بۆ گۆتووبێژکرنا بنپێکرنا سەروەریا ئیراقێ یە ژ ئالیێ ولاتێن بیانی ڤە ب تایبەتی ئەمەریکایێ، پشتی وێ ئێریشا ئەمەریکایێ ل بەغدایێ پێک ئانی و بوو سەدەما کوشتنا فەرماندارێ فەیلەقا قودس یا سوپایێ پاسدارێن ئیرانێ قاسم سولێیمانی و جیگرێ سەرۆکێ دەستەیا ھەشدا شەئبی، ئەبوو مەھدی مووھەندس و چەند فەرماندارێن دن یێن ئیرانی و ھەشدا شەئبی، ل سەر رێیا فرۆکەخانەیا ناڤدەولەتی یا بەغدایێ.
وێ د جڤینا پارلامەنتۆیێ دە “رەشنڤیسا پرۆژە بریارەکێ ژ بۆ دەرخستنا ھێزێن ئەمەریکایێ ژ ئیراقێ وەرە ئامادەکرن، بۆ ڤێ مەبەستێ زیدەتر ژ 160 ئیمزایێن پارلامەنتەران ھاتنە کۆمکرن.
تێ پێشبینیکرن پارلامەنتۆیا ئیراقێ دەست ب خوەندن و پەسەندکرنا رەشنڤیسا پێشنیار-یاسایا دەرخستنا ھێزێن بیانی ژ ئیراقێ بکە، ژبەرکو رێکەفتنا ستراتیژیک د ناڤبەرا ئیراق و ئەمەریکایێ دە ھەیە، لەورا دڤێ ب یاسایێ ئەو رێکەفتن بێ ھلوەشاندن، د دەمەکێ دە بەرێ فراکسیۆنێن شیئە ھەولا پەسەندکرنا پێشنیار-یاسایا دەرخستنا ھێزێن بیانی ژ ئیراقێ دابوو و مەبەستا سەرەکی ژی، دەرخستنا ھێزێن ئامەریکایێ یە ژ ئیراقێ، پەسەندکرنا ڤێ پێشنیار-یاسایێ پێتڤی ب دەنگێن پرانیا ئەندامێن پارلامەنتۆیێ ھەیە، واتە دەنگێ 165 پارلامەنتەر، د دەمەکێ دە کو 177 ئەندامێن پارلامەنتۆیا ئیراقێ شیئە نە و تێ پێشبینیکرن بەشەکی زێدە ژ فراکسیۆنێن کوردستانی و بەشەک ژ سوننەیان دەنگ بۆ دەرخستنا ھێزێن ئەمەریکایێ نەدن.
تێ زانین کو حیزب الله یا ئێراقی گەف ل هەر یەک ژ فراکسیۆنێن کوردی و سوننە کرنە کو بەشداری روونشتنا پارلەمنتۆیا ئیراقی ببن ژ بۆ دەرکرنا پرۆژە یاسایا دەرکرنا هێزێن بیانی لسەر خاکا ئیراقی، بەرەڤاژی هەر فراکسیۆن یان پارلەمانتارەک کو بەشداری روونشتنێ نەبە وێ وەکە خائین وەرە ناسکرن.
چاڤدێرێن سیاسی ڤێ گەفا حیزب الله وەکە گەفەک لسەر دیمۆکراسیەتێ دبینن و رادگهینن نابە تو گڤاشەک لسەر تو فراکسیۆن یان ئەندام پەرلەمانەکێ هەبن ژ بۆ بریاردان لسەر پرۆژە یاسایەکێ د ناڤا پارلامەنتۆیێ دە.
