پارلەمەنا ئیراقێ بریارا دەرکرنا هێزێن هەڤپەیمانان ل ئیراقێ دا

پارلەمەنا ئیراقێ بریارا دەرکرنا هێزێن هەڤپەیمانان ل ئیراقێ دا

پارلەمەنا ئیراقێ ئیرۆ د روونشتنا خوە ئا نەئاسایی دە، پرۆژە بریارەک 5 خالی پەژراند و بریار دا هێزێن هەڤپەیمانان ل ئیراقێ وەرن دەرکرن.

پاش کوشتنا هەر ئێک ژ قاسم سولەیمانی فەرماندارێ سوپایێ قودس ئێ ئیرانێ و ئەبۆ مەهدی موهەندیس جێگرێ سەرۆکێ دەستەیا حەشدا شەعبی یا ئیراقێ  ژ ئالیێ بالەفرێن بێ پیلۆت ئێن ئەمەریکاڤە ل سەرێ سبێ یا رۆژا ئینی 3/1/2020ان ل نێزی بالەفرخانەیا بەغدایێ، ئیرۆ پارلەمەنا ئیراقێ وەکە کارڤەدانەک ل همبەر ڤی کارێ ئەمەریکا جڤینەک نەئاسایی ل دار خست و تێدە بریار ل سەر دەرکرنا هێزێن هەڤپەیمانان ل ئیراقێ دا.

ئەڤێن ل خوارێ دیار ئەو خالن یێن کو پارلەمه‌نا ئیراقێ بریار ل سەر دای:

– هەلوەشاندنا وێ داخوازا کو پێش نها ئیراقێ ژ بۆ هەڤپەیمانییا ل دژی دائشێ هنارتبوو.

– پێدڤی دکە ل سەر هکوومەتا ئیراقێ کو رێ نەدە تو هێزەکە بیانی ب هەر ئەگەرەکێ خاک و ئاڤ و ئاسیمانێ ئیراقێ ببەزینە.

–  سینۆردارکرنا چەکان د دەستێ دەولەتێ دە.

– پێدڤی دکە وەزیرێ دەرڤە ئێ ئیراقێ ل نەتەوەیێن یەکبوویی سکالایێ ل دژی ئەمەریکایێ تۆمار بکە ژبەر پێشلکاریێن مەترسیدارێن وی ولاتی ل دژی ئیراقێ.

– هکوومەتا ئیراقێ هەری زوو لەکۆلینان بکە لسەر ئێریشێن ئەمەریکا و ئەنجامێن وان لەکۆلینان ژ بۆ پارلەمێنتۆیێ ئەشکەرە بکە.

تێ زانین کو ل هەیڤا ئیلۆنا سالا 2014ان دە ئیراقێ ب رێیا ئیبراهیم جەعفەری، وەزیرێ دەرڤەیێ ئیراقێ ل وێ دەمێ ژ جڤاتا ئاساییشا نەتەوەیێن یەکبوویی رە راگهاندبوو كو ئه‌و پێشوازیێ ل هەڤکاری و ئالیکاریێن هەڤپەیمانییا ناڤدەولەتی یا دژی دائشێ دکن ژ بۆ ئیراقێ، ل وێ دەمێ دە ئیراقێ ژ بلی ئالیکاریێن دن داخوازا هەڤکاریێن سەربازی ل هێزێن هەڤپەیمانان ب سەرۆکاتیا ئەمەریکا کربوو.