ئیران پر عاجزه‌ و رێیا تۆلهلدانێ ژ ئه‌مه‌ریكایێ ده‌ست نیشان دكه‌

ئیران پر عاجزه‌ و رێیا تۆهلدانێ ژ ئه‌مه‌ریكایێ ده‌ست نیشان دكه‌

ته‌رمێ قاسم سوله‌یمانی گها ئیرانێ و یه‌كێتییا ئه‌ورۆپا زه‌ریفی گازی كر

جه‌سه‌دێ قاسم سوله‌یمانی ل ئیرانێ ب سلۆگان و گه‌فێن مه‌زهه‌بی هات پێشوازی كرن، یه‌كێتییا ئه‌ورۆپا ژی وه‌كه‌ هۆشداری محه‌مه‌د جه‌واد زه‌ریفی، وه‌زیرێ كارێن ده‌رڤه‌ یێ ئیرانێ گازی كریه‌ برۆكسلێ، ل ده‌مه‌كی دۆنالد ترامپ سه‌رۆكێ ئه‌مه‌ریكایێ ئه‌شكه‌ره‌ كریه‌ كو هه‌گه‌ر هه‌ر ئێریشه‌كه‌ ره‌ژیما ئیرانێ ل سه‌ر به‌رژه‌وه‌ندیێن ئه‌مه‌ریكایێ وه‌ره‌ پێكئانین، 52 ناڤه‌ندێن گرینگ یێن سه‌ربازی، ئابووری و كولتووری یێن ئیرانێ وێ كه‌ڤن به‌ر ئیریشێن ئه‌مه‌ریكایێ و وه‌رن ژناڤبرن.

ئیرۆ یه‌كشه‌می 5/1/2020ان جه‌سه‌دێ قاسم سوله‌یمانی فه‌رماندارێ فه‌یله‌قا قودس یا سپایێ پاسداران كو ل ئینیا رابووری د ئێریشه‌كه‌ ئاسیمانی یا ئه‌مه‌ریكایێ ده‌، ل نێزی باله‌فرخانه‌یا به‌خدایێ هات هه‌ده‌ف كرن، گها باژارێ ئه‌هوازێ و ل ور ب سلۆگان و گه‌فێن مه‌زهه‌بی هات پێشوازی كرن و بۆ باژارێ مه‌شهه‌دێ هات ب رێكرن.

جه‌سه‌دێ قاسم سوله‌یمانی، ل باژارێ مه‌شهه‌دێ دێ ژ بۆ باژارێ ته‌هرانا پایته‌خت وه‌ره‌ ڤه‌گوهاستن و تێ چاڤه‌رێ كرن سبه‌ رۆژا دوشه‌می 6/1/2020ان مه‌راسیم ژ بۆ وه‌رن ل دارخستن و پشتره‌ ژ بۆ باژارێ قوم بێ ڤه‌گوهاستن، ل گۆر به‌رنامه‌یه‌كی كو سپایێ پاسداران راگهاندیه‌، رۆژا سێشه‌می 7/1/2020ان، جه‌سه‌دێ قاسم سوله‌یمانی وێ بگه‌هه‌ باژارێ كرمانێ جیێ ژ دایكبوونا وی و ل ور وێ وه‌ره‌ بن ئاخ كرن.

جه‌ماوه‌رێ ئیرانێ و سپایێ پاسداران د مه‌راسیما پێشوازی كرن و ئۆخر كرنێ ده‌ ل جه‌سه‌دێ قاسم سوله‌یمانی، هه‌ژماره‌كه‌ سلۆگانێن مه‌زهه‌بی و گه‌ف كرنێ د گۆتن، هه‌ر چه‌ند كو پرانیا وان سلۆگانان  ل دژی ئه‌مه‌ریكا و ئیسرائیلێ بوون، لێ به‌لێ به‌شا هه‌ر زێده‌ گرێدای ره‌وشا هوندر یا ولات بوون.

ئیران دبێژه‌ وێ ئه‌مه‌ریكایێ، ئیسرائیل و سعوودیێ ژناڤ ببه‌ین

چاڤدێرێن كو ره‌وشا ئیرانێ د شۆپینن ل وێ باوه‌رێ نه‌ كو كۆمارا ئیسلامی وێ هه‌موو هه‌ولێن خوه‌ بده‌ كو مفایه‌كێ هه‌ری زێده‌ ژ ده‌رفه‌تا كوشتنا قاسم سوله‌یمانی ل ئاستا ناڤچه‌یی و ده‌ڤه‌رێ ب گشتی و ل ئاستا هوندرا ولات ب تایبه‌تی ب ده‌ست خوه‌ بێخه‌، ل گۆر سلۆگانێن كو ئیرۆ ل باژارێن ئه‌هواز و مه‌شهه‌دێ د هاتن گۆتن، راستییا نه‌رینا چاڤدێران ب زه‌لالی تێ دیتن كو پێشبینیا وان هنه‌كی مه‌نتق تێده‌یه‌.

ژ بلی سلۆگانێن «مرن ژ بۆ ئه‌مه‌ریكایێ» «مرن ژ بۆ ئیسرائیلێ» كو ل ده‌ما 40 سالێن رابووری ئیرانییان د ته‌ڤ بوون و هه‌لكه‌فتان ده‌ گۆتنه‌، هنه‌ك سلۆگانێن دن یێن ب گه‌ف هاتن گۆتن كو تێده‌ گه‌فا ژناڤبرنا ئه‌مه‌ریكا و ئیسرائیلێ و هه‌ر وها ئه‌ره‌بستانا سعوودیێ دهاتن گۆتن.

لێ به‌لێ به‌شه‌كا به‌رچاڤ یا سلۆگانان په‌یوه‌ندی ب ره‌وشا هوندر یا ئیرانێ ڤه‌ هه‌بوون وه‌كه‌ سلۆگانا «خوینا سلێمانی ژیان ب مه‌ به‌خشی و ئه‌م ژ ئاژاوێ ده‌رباس كرن»، مه‌به‌ست ژ ڤێ سلۆگانێ خوه‌پێشاندانێن ڤێ داویێ یێن باژارێن ئیرانێ و رۆژهلاتا كوردستانێ بوون كو د ئه‌ده‌بیاتێن ئیرانێ ده‌ پێلێن گه‌رم یێن نه‌رازیبوونێن جه‌ماوه‌ری ب ئاژاوه‌ تێن ب ناڤ كرن.

كۆمارا ئیسلامییا ئیرانێ ل ده‌مه‌كێ جادده‌یا ئیرانێ ب پرسا شینی و بن ئاخ كرنا جه‌سه‌دێ قاسم سوله‌یمانی ڤه‌ مژوول كریه‌، به‌شه‌كا ئاژانسێن ناڤده‌وله‌تی ئه‌شكه‌ره‌ كرنه‌ كو هنه‌ك په‌یام د ناڤبه‌را ئیران و ئه‌مه‌ریكایێ ده‌ هاتنه‌ لهه‌ڤگوهارتن.

د ڤان په‌یامان ده‌، نامه‌یه‌كه‌ مایك پۆمپێیۆ وه‌زیرێ كارێن ده‌رڤه‌ یێن ئه‌مه‌ریكایێ هه‌یه‌ كو تێ گۆتن ب رێیا بالیۆزێ سویسرایێ گهایه‌ ته‌هرانێ و هه‌ر وها باس ل سه‌ره‌دانا شانده‌كا ولاتێ عومانێ بۆ ته‌هرانێ و هه‌ولدان ژ بۆ ناڤگینیا د ناڤبه‌را ته‌هران و واشنتۆنێ ده‌ دكه‌ و تێ گۆتن هنه‌ك په‌یامێن كاربده‌ستێن كۆچكا سپی د گه‌ل ده‌ بوون.

باس ل به‌رنامه‌یێ سه‌ره‌دانا لاڤرۆڤ وه‌زیرێ كارێن ده‌رڤه‌ یێ رووسیایێ ژ بۆ ته‌هرانێ تێ كرن ب مه‌به‌ستا ئارام كرنا ره‌وشێ، هه‌ر وها باس ل وێ یه‌كێ تێ كرن كو وه‌زیرێ ده‌رڤه‌ یێ قه‌ته‌رێ د سه‌ره‌دانا رۆژا شه‌می ده‌ ژ بۆ ته‌هران هه‌لگرێ په‌یاما ده‌وله‌تا ئه‌مه‌ریكایێ بوویه‌.

بزاڤێن ناڤیگینیا ته‌هرانێ و واشنتۆنێ بێ ئه‌نجامن و ئیران ل سه‌ر هه‌لوه‌ستا خوه‌ یا تۆلهدانێ موكره‌

عه‌باس مووسه‌وی به‌رده‌ڤكێ وه‌زاره‌تا ده‌رڤه‌ یا ئیرانێ، ئیرۆ د كۆنفه‌ره‌نسه‌كه‌ چاپه‌مه‌نیێ ده‌، ب ئاوایه‌كێ وها ئه‌و هه‌ولدان پشت راست كرن، لێ به‌لێ ئاماژه‌ ب وێ یه‌كێ كر كو تو ده‌رئه‌نجامه‌ك نه‌بوو و ئیران ل سه‌ر هه‌لوه‌ستا خوه‌ یا تۆلهلدانێ موكره‌، لێ كولتوورێ قاسم سوله‌یمانی ل دژی توندوتیژیێ بوو و ته‌هرانێ حه‌ز ل سه‌ر شه‌ری نینه‌ و هه‌ول ددن به‌رسڤا وان ب ئاوایه‌كی به‌ كو شه‌رێ د ناڤبه‌را ئه‌مه‌ریكا و ئیرانێ ده‌ ل په‌ی خوه‌ نه‌ئینه‌.

ب گۆتنا مووسه‌وی نامه‌یا وه‌زیرێ ده‌رڤه‌ یا ئه‌مه‌ریكایێ بێ رومه‌ت كرن تێده‌ بوو كو وان ژی د ئاسته‌كێ هه‌ری نزم ده‌ و ب هه‌مان وێژه‌ به‌رسڤا وان دایه‌.

ل سه‌ر شاندا مه‌سقه‌تێ ژی به‌رده‌ڤكێ كۆمارا ئیسلامییا ئیرانێ راگهاند، ئه‌و شاند ل ئیرانێ ژ ئالیێ تو كه‌سێ نه‌هاتن وه‌رگرتن و ب ده‌ستێن به‌تال ئان ب ده‌ستێن ڤالا ڤه‌گه‌رین.

ناڤبووری ئاماژه‌ ب وێ یه‌كێ ژی كر كو وه‌زیرێ كارێن ده‌رڤه‌ یێ قه‌ته‌رێ به‌ری نها به‌رنامێ گه‌شتكرنێ دانابوو و تو په‌یامه‌ك پێره‌ نه‌بوو.

بێ پیلۆتێن سوله‌یمانی كوشتی ژ قه‌ته‌رێ رابوونه‌

ل سه‌ر وێ پرسێ ژی كانێ ئایا راسته‌ باله‌فرێن بێ پیلۆت كو قاسم سوله‌یمانی هه‌ده‌ف كرنه‌ ژ قه‌ته‌رێ رابوونه‌، مووسه‌وی گۆت: ئه‌و كارێ بسپۆرێن سه‌ربازی یه‌ و من ئاگه‌هـی ل سه‌ر نینه‌.

به‌شه‌كا ئاژانسێن لۆكال یێن نێزیك ژ ده‌ستهلاتدارێن ته‌هرانێ باس ل وێ یه‌كێ كرنه‌ كو واشنتۆن ب رێیا 16 ولاتان ب ئاوایێن جودا داخواز ژ ئیرانێ كرنه‌ كو ئه‌گه‌ر تو دژه‌ كریاره‌ك نه‌به‌، ئه‌و ئاماده‌نه‌ دۆرپێچێن سه‌ر ئیرانێ هه‌لبوه‌شینن. ئه‌ڤ نووچه‌یه‌ ژ ئالیێ چاڤدێران ڤه‌ وه‌كه‌ حه‌ز و ئاماژه‌یێن حكوومه‌تا ته‌هرانێ تێ مێزه‌ كرن و وه‌كه‌ گرینگترین وان ئارمانجان تێ دانین كو ده‌ستهلاتا ته‌هرانێ دخوازه‌ د ئاستا ناڤده‌وله‌تی ده‌ ب ده‌ست بینه‌.

ترامپ ئارمانج ل 52 هه‌ده‌فێن گرینگ یێن ئیرانێ گرتیه‌

هه‌موه‌خت دۆنالد ترامپ سه‌رۆكێ ئه‌مه‌ریكایێ و بریارده‌رێ كوشتنا قاسم سوله‌یمانی د تویته‌كێ ده‌ گه‌له‌ك ب زه‌لالی كۆمارا ئیسلامییا ئیرانێ هایدار كرییه‌ كو د ئه‌گه‌را هه‌ر شاشێتیه‌كه‌ ته‌هرانێ ده‌ و ئێریشكرنا سه‌ر هێز و به‌رژه‌وه‌ندیێن ئه‌مه‌ریكایێ وهه‌ڤپه‌یمانێن وێ، وێ 52 ناڤه‌ند و پێگه‌هێن گرینگ یێن سه‌ربازی، ئابووری و كولتووری یێن د هوندرێ ئیرانێ ده‌ (ب نیشانا 52 بارمته‌یێن ئه‌مه‌ریكی كو ل سالا 1979 ژ ئالیێ ئالیگرێن شۆرشا ئیسلامییا ئیرانێ ڤه‌ هاتبوونه‌ گرتن و زیندانی كرن) وه‌رن ئارمانج كرن كو به‌شه‌ك ژ وان پێگه‌هان  ژبۆ ئیرانێ و كولتوورێ ئیرانێ گرینگیه‌كه‌ بێ هه‌مپا هه‌یه‌.

ترامپ د ئاخفتنا خوه‌ ده‌ ته‌كه‌ز دكه‌ كو ئه‌مه‌ریكا ئێدی زێده‌تر ته‌حه‌مولا گه‌فێن ئیرانێ ناكه‌، هه‌ر وها ئاماژه‌ ب وێ یه‌كێ كر كو قاسم سوله‌یمانی د داوی كوشتنێن خوه‌ ده‌، ولاتیه‌كێ ئه‌مه‌ریكی كوشتییه‌ و د ده‌ما ژیێ خوه‌ ده‌ هه‌ژماره‌كه‌ زۆر ژ خه‌لكێ د ناڤا ئیرانێ و ده‌رڤه‌ی ئیرانێ كوشتینه‌ كو به‌شه‌ك ژ وان د خوه‌پێشاندانێن ڤێ داویێ یێن ئیرانێ دا بوون و ب فه‌رمانا وی ئه‌و خوه‌پێشانده‌ر هاتنه‌ كوشتن.

ئه‌ورۆپا دخوازه‌ ئیرانێ ژ ده‌رئه‌نجاما جه‌نگێ هایدار بكه‌

هه‌موه‌خت جۆزێڤ بۆرل به‌رپرسیارێ سیاسه‌تا ده‌رڤه‌ یا یه‌كێتیا ئه‌ورۆپایێ ئه‌شكه‌ره‌ كر كو د په‌یوه‌ندیه‌كه‌ تێله‌فوونی ده‌، داخواز ژ محه‌مه‌د جه‌واد زه‌ریف وه‌زیرێ ده‌رڤه‌ یێ ئیرانێ كرییه‌ ب مه‌به‌ستا گۆتوبێژكرنا كارڤه‌دانێن ئیرانێ ل همبه‌ر كوشتنا قاسم سوله‌یمانی سه‌ره‌دانا برۆكسل بكه‌. به‌شه‌ك ژ ئاژانسێن مه‌دیایێ ئه‌شكه‌ره‌ كرنه‌ كو ئه‌ورۆپا دخوازه‌ ئیرانێ  ژ ده‌رئه‌نجامێن هه‌ر جوره‌ تۆلهلدانه‌كه‌ سه‌ربازی هایدار بكه‌.

وه‌زیرێ ده‌رڤه‌ یێ به‌ریتانیا قاسم سوله‌یمانی وه‌كه‌ خه‌ته‌ره‌ك ل سه‌ر ناڤچه‌یێ ناساندیه‌ و باس ل وێ یه‌كێ كریه‌ كو ئه‌مه‌ریكا مافێ وێ یه‌ ژ بۆ به‌ره‌ڤانیكرنێ ل خوه‌ ئێریش دكه‌ سه‌ر و چاڤدێر ل وێ باوه‌رێ نه‌ كو ئه‌ڤ هه‌لوه‌ستا له‌نده‌نێ دبه‌ هه‌لوه‌ستێ پرانییا ولاتێن ئه‌ورۆپایێ به‌، هه‌ر ژ به‌ر ڤێ سه‌ده‌مێ ئیران ژی هه‌نگاڤێن پێنجێ یا تایبه‌ت ب كێم كرنا ئاستا پابه‌ندبوونێن خوه‌ سه‌باره‌ت ب لهه‌ڤهاتنا ئه‌تۆمی راگرتیه‌ و وها تێ دیتن د ڤێ بابه‌تێ ده‌ وه‌كه‌ كارته‌كا فشارێ دژی ئه‌ورۆپایێ بكار بینه‌ كو گۆمان تێ كرن ئه‌ڤ هه‌نگاڤتا ئیرانێ ب ئه‌نجام بگه‌هیت.

تۆلهلدانا ئیرانێ باس لێ دكه‌ ته‌نێ پرۆباگنده‌یه‌

چاڤدێرێن ره‌وشا ئیرانێ ل وێ باوه‌رێ نه‌ كو دبه‌ كارڤه‌دانێن ئیرانێ زۆر جددی نه‌بن و هه‌گه‌ر كاره‌ڤه‌دانه‌ك ژی هه‌به‌، پێتر ئالیێ پرۆباگندێ بۆ گرینگه‌ و ناخوازه‌ زه‌بره‌كه‌ ب ئێش ل ئه‌مه‌ریكایێ بده‌ كو ئه‌ڤ ئێشانا وێ بگه‌هه‌ ئیرانێ ژی.

ب نه‌رینا چاڤدێران دیكتاتۆر ب گشتی ترسنۆكن و كۆمارا ئیسلامی ب ته‌نێ ژ بۆ كوشتن و ژناڤبرنا گه‌لێن بن ده‌ست یێن ئیرانێ و خه‌لكێ بێ ده‌ستهلات ژ وان گه‌لێ رۆژهلاتا كوردستانێ زیره‌كن، گه‌ر نا خوه‌ ل شه‌رێن مه‌زن ناده‌ و ژ بۆ مانا ده‌ستهلاتا خوه‌ یا گه‌نده‌ل و تۆتالیتار ئاماده‌نه‌ ل گه‌ل شه‌یتانی ژی ل هه‌ڤ بكن.