سەکرەتەرێ گشتییێ کونسەیا بلندا ئەولەکاریا نەتەوەیی یا ئیرانێ، عەلی شەمخانی دیار کر کو ژ بۆ بەرسڤا کوشتنا جەنەرال قاسم سولەیمانی، تەھران ل سەر 13 سیناریۆیان د سەکنە.
ل گۆری ئاژانسا نووچەیان میهه‌رێ، شەمخانی وھا ئاخڤی: “د جڤینا کونسەیێ دا ژ بۆ تۆلا سولەیمانی 13 سیناریۆ ھاتن رۆژەڤێ. سیناریۆیا کو د ئاستا ھەری ژێر دایە ژی ھەگەر وەرە تەتبیق کرن، دێ ژ بۆ ئەمەریکییان ببە کابووسەکە دیرۆکی”.
شەمخانی دەر ھەقێ سیناریۆیێن ناڤبووری دا زانیاری نەدان و گۆتنا رێبەرێ دینی یێ ئیرانێ عەلی خامنەیی یا “ھەموو ھێزێن بەرخوەدانێ دێ تۆلا سولەیمانی ھلدن” دا ببیرخستن و دیار کر کو بەرسڤ دێ نە ب تەنێ ژ ئێریشەکێ پێک وەرە.
شەمخانی ئیدیعا کر کو ل ھەرێمێ ئەسکەرێن ئەمەریکایێ دەوریەیێن خوە کێم کرن و ڤەگەریان بارەگەھێن خوە و وھا گۆت: “ل ھەرێمێ 19 بارەگەھێن ئەمەریکایێ ھەنە، 11 ژێ نێزیکی سینۆرێن مە یێن رۆژھلات و رۆژئاڤا نە، ل 8 بارەگەھێن ل باکور و باشوورێ مە کەتنە ئاماده‌باشیێ، دەر ھەقێ ئەسکەر و ئاماده‌كاریێن وان یێن ل ڤان دەران دا ئاگاھیا مە ھەیە، ئەم لڤ و تەڤگەرا وانا ھەری پچووک ژی دشۆپینن.”
کوشتنا سولەیمانی
وەزارەتا پاراستنێیا ئەمەریکایێ (پەنتاگۆن) ل 3/1/2020ان راگھاندبوو کو قاسم سولەیمانی فەرماندارێ ھێزا قودسێ یا مھافزێن شۆرشا ئیرانێ و ئالیکارێ سەرۆکێ ھەشدا شه‌ئبی ئەبۆ مەھدی موھەندس د ئێریشا کو نێزی بالافرگەھا بەخدایێ ھات کرن دا ھاتن کوشتن.
د ئێریشێ دا ل گەل سولەیمانی و سەربازێن ئیرانی، 10 کەسێن کو د ناڤا وان دا موھەندس ژی ھەیە، ھاتبوون کوشتن.
رێبەرێ دینی یێ ئیرانێ ئایەتوللاھ عەلی خامەنەیی د داخویانیا خوە یا ئەولا پشتی ئێریشێ دا گۆتبوو کو ژ ئەمەریکایێ تۆل دێ وەرە ستاندن.
