ته‌هران به‌هسا 13 سیناریۆیان ژبۆ تۆلهلدانێ دكه و واشنتۆنێ ژی 6 باله‌فرێن بۆمب هاڤێژ ژ جورێ B 52 ره‌وانه‌ی ناڤچه‌یێ كرنه، جه‌سه‌دێ قاسم سوله‌یمانی ل باژارێ كرمانێ ل جهێ ژ دایكبوونا وی هات بن ئاخ كرن و د مه‌راسیمێ ده، ب ده‌هان كه‌سان جانێ خوه ووندا كر و هه‌ژماره‌ك بریندار كه‌تن، هه‌موه‌خت د به‌رده‌وامیا گه‌فێن به‌رپرسیاریێن ئیرانێ و ئه‌مه‌ریكایێ ده، ئیران دبێژه: 13 سیناریۆ ژ بۆ تۆلهلدانێ د رۆژه‌ڤێ ده نه و ئه‌مه‌ریكایێ 6 باله‌فرێن جه‌نگی یێن هه‌ری خه‌ته‌ر كو ب B 52 تێن ناس كرن، ره‌وانه‌ی ناڤچه‌یێ كرنه.
ئیرۆ رۆژا سێشه‌می 7/1/2020ان مه‌راسیما شینی و بن ئاخ كرنا جه‌سه‌دێ قاسم سوله‌یمانی، فه‌رماندارێ فه‌یله‌قا قودس یا سپایێ پاسداران برێڤه‌چوون و ل باژارێ كرمانێ جیێ ژ دایكبوونا وی، پشتی 5 رۆژ ل سه‌ر وه‌ختا كوشتنا وی ده‌رباسبووین هات بن ئاخ كرن.
د مه‌راسیمێ ده، بێهتر ژ 50 كه‌سان د بوویه‌ره‌كه ب سه‌ر هه‌ڤ چوونێ ده جانێ خوه ووندا كر و ب ده‌هان كه‌س بریندار كه‌تن، ئه‌گه‌ر چ به‌رپرسیارێ هێزێن ئه‌وله‌هییا باژارێ كرمانێ راگهاند كو ئه‌ڤ قوربانی ب سه‌ده‌ما قه‌ره‌بالخێ جانێ خوه ووندا كرنه، لێ به‌هسا وێ یه‌كێ هه‌یه كو ئه‌ڤ قوربانی ب سه‌ده‌ما ئێریشا هنه‌ك كه‌سێن نه‌ناسیار هاتنه كوشتن و بریندار كرن.
هه‌ژی بیرئانینێ یه، به‌شه‌كا ئاژانسێن ناڤخوه یێن ئیرانێ ئه‌شكه‌ره كرنه كو دوهـ رۆژا دوشه‌می 6/1/2020ان و د مه‌راسیما شینی و پێشوازی كرنێ ل جه‌سه‌دێ قاسم سوله‌یمانی ل ته‌هرانێ، بێهتر ژ 20 هزار حاله‌تێن دزیێ وه‌كه دزینا مۆبایل و په‌ره‌ی روودانه ب گۆتنه‌كه دن، بهێتر ژ 20 هزار كه‌سان ته‌نێ ب مه‌به‌ستا دزیێ به‌شداری مه‌راسیمێ ببوون.
حسێن سه‌لامی فه‌رماندارێ سپایێ پاسداران د مه‌راسیمێ ده گه‌فێن تۆلهلدانێ ژ كوشتنا قاسم سوله‌یمانی پشت راست كر و گۆت: هه‌ر ژ ده‌ستپێكێ دێ داوی گۆتنا خوه بێژم، ئه‌و ژی دێ تۆلێ ستینین، تۆله‌كه توند و موحكه‌م ب ئاوایه‌كی كو پووشمانیا بكوژێن سوله‌یمانی وێ ل په‌ی وه‌ره، پشت راست بن.
سه‌لامی د به‌شه‌كه دن یا گۆتنێن خوه ده ده‌سته‌واژێ (ئه‌نییا به‌رگریێ) ب كارئانی كو به‌رده‌وام ژ ئالیێ كاربده‌ستێن ته‌هرانێ ب كار تێ و مه‌به‌ست پێ ئه‌و ئالیێن ناڤچه‌یێ نه كو هه‌ڤپه‌یمانێن كۆمارا ئیسلامی نه و جهێ داخێ یه هنه‌ك ئالیێن كوردی ژی تێده نه.
ناڤبووری دوپات كر كو هه‌گه‌ر ئه‌مه‌ریكا به‌رسڤا ئێریشان بده، ڤێ جارێ ئیسرائیل وێ وه‌ره شه‌وتاندن، لێ روهن نه‌كر كانێ بۆچی هه‌یا نها ئه‌وان ئه‌ڤ كار نه‌كریه و ئیسرائیل نه شه‌وتاندیه.
لاوازترین بژارده‌یا ئیرانێ دێ وه‌كه كابۆسه‌كێ به ژ بۆ ئه‌مه‌ریكایێ
ژ ئالیێ خوه ڤه عه‌لی شه‌مخانی، سه‌كره‌ته‌رێ ئه‌نجوومه‌نا بلند یا ئاساییشا نشتیمانی یا ئیرانێ راگهاند، هه‌یا نها 13 سیناریۆ ژ بۆ به‌رسڤدایینێ ئاماده‌نه، یا ژ هه‌موویان لاوازتر دێ وه‌كه كابۆسه‌كه دیرۆكی به ژ بۆ ئه‌مه‌ریكیان.
ب گۆتنا شه‌مخانی به‌رسڤدایینا ئیرانێ ته‌نێ ب ئێریشه‌كێ نابه و هه‌گه‌ر ئه‌مه‌ریكی ب پێیێن خوه ژ ناڤچه‌یێ ده‌رنه‌كه‌ڤن، ئه‌مێ كاره‌كێ وها بكن كو ئه‌و ته‌رمێن خوه ببن.
حه‌سه‌ن رۆحانی سه‌رۆك كۆمارێ ئیرانێ كو ب دوریشما میانره‌وی و ئیعتیدالێ وه‌زیفه‌دار بوویه، ئیرۆ راگهاند كو ئه‌وێ تۆلێ هلدن و به‌رپرسیاریا تۆلهدانێ ژی هلگرن.
هه‌موه‌خت، پارلمه‌نا ئیرانێ ئارته‌شا ئه‌مه‌ریكایێ خسته لیستا ته‌رۆرێ و هه‌ر ئیرۆ د جڤینه‌كه نه‌ئاسایی ده بریار دا 200 ملیۆن یۆرۆ ژ بودجه‌یا ئیرانێ ژ بۆ بهێزكرنا فه‌یله‌قا قودس وه‌رن ته‌رخان كرن، د ڤێ ره‌وشا شه‌پرزه ده ئیران ب هێڤی یه ب رێیا وی په‌ره‌ی ئالیێن هه‌ڤپه‌یمانێن خوه رازی بكه كو ل به‌ر سینگا ئه‌مه‌ریكایێ راوه‌ستن، لێ وها دیاره هه‌ر ئیرۆ تالیبانا ئه‌فغانستانێ راگهاندیه كو ئه‌و نابه به‌شه‌ك ژ شه‌رێ ل ناڤبه‌را ئیران و ئه‌مه‌ریكایێ و هه‌ڤپه‌یمانێن دنێن ئیرانێ ژی هینا نها نه زه‌لاله كانێ چه‌ند ئاماده‌نه ژ بۆ ئیرانێ شه‌ر بكن.
ئه‌نییا به‌رگریێ
تشتا كو هه‌یا نها تێ دیتن ئه‌وه كو ئیران به‌رده‌وام به‌هسا ب ئارمانج گرتنا به‌رژه‌وه‌ندیێن ئه‌مه‌ریكایێ ل ناڤچه‌یێ ب پشت به‌ستن ل سه‌ر (ئه‌نییا به‌رگریێ) دكه، د مه‌راسیما دوهـ یا ته‌هرانێ ژی ده كه‌چا قاسم سوله‌یمانی كو ئه‌و ب خوه هه‌لگرا پاسپۆرا ئه‌مه‌ریكی یه، خوه‌ست هێزێن ئه‌مه‌ریكی ژ ناڤچه‌یێ وه‌رن ده‌رخستن، هه‌موه‌خت ژ حه‌سه‌ن نه‌سروللا یێ سه‌رۆكێ حزبوللا خوه‌ست تۆلا بابێ وێ هلده.
هه‌ژی بیرئانینێ یه، مورته‌زا ئه‌لویری سه‌رۆكێ ئه‌نجوومه‌نا بلند یا پارێزگارێن ئیرانێ به‌را كوشتنا قاسم سوله‌یمانی د به‌لگه‌یه‌كه ڤیدیۆیی ده ئه‌شكه‌ره كر كو 12 دۆسیێن گه‌نده‌لیێ ل سه‌ر مالباتا سوله‌یمانی ئه‌شكه‌ره بوونه و دۆسیه ژ بۆ سازییا دادێ یا ئیرانێ هاتنه ره‌وانه كرن، لێ به‌لێ دووڤچوون ژ بۆ وان دۆسییان نه‌هات كرن.
تۆرا سی ئێن ئێن یا ئه‌مه‌ریكی ل سه‌ر زارێ مه‌زنه به‌رپرسێن وه‌زاره‌تا به‌رگریێ ئه‌شكه‌ره كر كو پێنتاگۆنێ 6 باله‌فرێن جه‌نگ یێن ژ جورێ B 52 كو ب باله‌فره‌كه هه‌ری خه‌ته‌ر یا سه‌ده‌یا 20ان تێ حه‌ساب كرن، ره‌وانه‌ی ناڤچه‌یێ كرنه و هه‌ر وه‌ختا فه‌رمان وه‌ره دایین، وێ د ئۆپه‌راسیۆنێن دژی ئیرانێ ده به‌شدار بن.
تشتا كو په‌یوه‌ندی ب كوردان ڤه هه‌یه و پێویسته ل سه‌ر راوه‌ستن ئه‌ڤه كو هه‌ر وه‌ك به‌را نها مه به‌هس كری، ئارمانج كرنا هێزێن ئه‌مه‌ریكی ل ناڤچه‌یێ ب پشت به‌ستن ل سه‌ر ئالیێن هه‌ڤپه‌یمانێن ئیرانێ، پر ره‌نگترین وان سیناریۆیانه كو كاربده‌ستێن ئیرانێ به‌هس دكن، ئه‌ڤ ژی ل ده‌مه‌كی یه كو ئه‌مه‌ریكا ژی بناغێ مه‌زنترین كونسلگه‌ری ل جیهانێ ل هه‌ولێرا پایته‌ختا هه‌رێما باشووری كوردستانێ دانایه.
ئیران دخوازه كوشتنا سوله‌یمانی د به‌رژه‌وه‌ندیا خوه ده بشكینه
نه‌رینا چاڤدێران وهایه كو ئیران دخوازه كوشتنا قاسم سوله‌یمانی بكه هێجه‌ته ژ بۆ كو پیلانێن خوه ل ناڤچه‌یێ ب جی بكه و گه‌له‌ك روهنه كو رێگریكرنا وێ ل رزگارییا كوردستانێ و ئاڤابوونا كیانه‌كه سه‌ربخوه یێ كوردی ل به‌را هه‌موو پیلانێن ره‌ژێما ئیرانێ ل ناڤچه‌یێ تێ، هه‌موه‌خت ل ناڤا كوردان هه‌ر چه‌ند ئالیگرێن كۆمارا ئیسلامی هه‌بن كو دیرۆكێ سه‌لماندیه وان حه‌ز ل شه‌رێ ناڤخوه هه‌یه، ل گه‌ل ئه‌ڤێ یاریێ هه‌ر ئه‌و ئالی نه ب كوردان ره دبێژن كو هایا وان هه‌به و پێویسته یه‌كگرتی بن و ته‌نێ ب ئیراده‌یا رزگاریخوازا نه‌ته‌وه‌یی وێ رێ ل به‌رانبه‌ر ڤان پیلانان وه‌ره گرتن.
تشتا كو دلگرانیا مه زێده دكه ئه‌و به‌هسن كو ل رۆژێن رابووری به‌شه‌كا مالپه‌رێن نێزی سپایێ پاسداران و وه‌زاره‌تا ئیتیلاعاتا ئیرانێ وه‌شاندنه، مینا باله‌فرا بێ پیلۆت كو قاسم سوله‌یمانی هه‌ده‌ف كری ژ هه‌ولێرا پایته‌خت رابوویه، یان ئه‌مه‌ریكایێ د په‌یوه‌نیا تێله‌فوونی ده سپاسیا هكوومه‌تا باشوور كریه ژ بۆ كو ئالیكاری د كوشتنا سوله‌یمانی ده كرنه، هه‌موه‌خت به‌رپرسیارێن هه‌رێما باشوور وه‌كو پێویست سه‌رساغی ژ ئیرانێ ره نه‌خوه‌ستن و به‌شداری به‌هیا سوله‌یمانی ل سلێمانیێ نه‌بوون.
جیێ داخێ یه به‌شه‌ك ژ ڤان نووچه‌یان ژ ئالیێ وان كوردان هاتن وه‌شاندن كو ده‌ما چه‌ندین سالانه خوه فرۆتنه كۆمارا ئیسلامیا ئیرانێ و هه‌ڤكارێن دێرین و یاریێن ده‌ستێ سپایێ پاسداران و قاسمێ سوله‌یمانی نه.
ب وێ هیڤیێ كو هشیاریا نه‌ته‌وه‌یی یا كوردان گهابه ئاسته‌كه وها كو رێ نه‌ده ئالیێن به‌رنیاسێن گرێدای داگیركاران ژ بۆ به‌رژه‌وه‌ندیێن به‌رته‌نگێن خوه جاره‌كه دن، مان و نه‌مانا تاكه كیانا نیڤ رزگاری یا كوردستانێ بێخنه به‌ر گه‌ف و خه‌ته‌رێن جددی.
