رۆژنامەیا نیۆیۆرتایمز د راپۆرەکا خوە یا درێژ دە هنەک ژ هوورگلیێن ئۆپەراسیۆنا کوشتنا قاسم سولەیمانی ل ئیراقێ و لهەڤگوهەرینا پەیامان د ناڤبەرا ئیرانێ و ئەمەریکایێ پاش بوویەرێ ژ بۆ دیتنا چارەسەرییان ژ بۆ کوورتر نەبوونا کریزێ خەبەر ددە.
ئەڤ رۆژنامە دنڤیسە کو رایەدارێن دەولەتا ترامپ ل ئەمەریکایێ ژ بۆ 18 مه‌هان نیقاش ل سەر هەدەف کرنا فەرماندارێ سپایێ قودسێ ئیرانێ کریە کانێ ئایا پێدڤی دکە وەرە کوشتن یان ژی نە.
ل گۆر زانیاریێن د ڤێ راپۆرێ دە هاتنه پارڤەکرن دەما کو ل مه‌ها رابووری دە ب ئێریشا ل سەر چار نەفتکێشان پەڤچوون دگەل ئیرانێ گهای ئاستا بلند، جان بۆلتۆن، شیرەتکارێ وی دەمی یێ ئاسایشا نەتەوی یێ سەرۆک کۆمارێ ئەمەریکا، ژ سوپا و سازیێن ئەولەهی یێن ئەمەریکایێ خوەست هنەک خالان ژ بۆ پاشڤەبرنا هەولێن ئیرانێ دیار بکن.
لگۆرەی راپۆرا ڤێ رۆژنامەیێ یەک ژ خالێن هاتیە باسکرن ژ بۆ بۆلتۆن کوشتنا قاسم سولەیمانی و هنەک دن ژ رایەدارێن سوپایێ پاسداران بوو. ژ وێ دەمێ بۆ کو پێکۆل ژ بۆ دیارکرنا سەفەرێن قاسم سولەیمانی زێدەتر بوون.
نیۆیۆرکتایمز دنڤیسە کو پاش ئارمانج کرنا قاسم سولەیمانی ل رۆژا ٣/١/٢٠٢٠ ل دەرۆرا بالەفرخانەیا بەغدایێ، ویلایەتێن یەکبوویی د هنەک پەیامێن نهێنی دە ژ ئالیێ سەفارەتا سۆئیسێ، ئیران نەچار کر کو ب توندی تۆلهلدانێ نەکت کو دۆنالد ترامپ ناچار بە کارڤەدانەک توند تر ژ کوشتنا قاسم سولەیمانی نیشان بدە.
عەلی فدوی جێگرێ فەرماندارێ گشتی یێ سوپایێ پاسدارا سەبارەت پەیاما ئەمەریکا کو ب رێیا سۆئیسێ ب وان گهاندی تەکەز کر و راگهاندبوو:”ئەمەریکیان سەرێ سبێ یا رۆژا ئەینی ب رێیێن دیبلۆماسی و رێیێن دن دخواست پەیوەندیێ دگەل ئیرانێ بکن و خوە ب مەرە راگهاند گەر هون دخوازن تۆلهلدانێ ژی بکن، ل گۆرەی کارێ کو مە ئەنجام دای، تۆلهلدانێ بکن، د دەمەکێ دە کو ئەو نکارن تو تشتەکێ دەستنیشان بکن”.
ئیرانێ سەرێ سبەیا رۆژا چارشەمی ٨/١/٢٠٢٠ ب تەقاندنا ١٦ مۆشەکان بەرەف پێگەهێن سەربازی یێن ئەمەریکا ل ئیراقێ دە کارڤەدانا خوە نیشان دا بێکو زرار بگەهە کەسەکێ، ئەڤ یەک نمایشەک تا رادەیەک بێ خەتەر بوو ژ هێزا ئیرانێ.
نیۆیۆرکتایمز بەردەوام دکە و دنڤیسە ئیران پاش ڤێ ئێریشێ ب رێیا سۆئیسێ پەیامەک ژ ئەمەریکایێ رە شاند و تێدە راگهاند ئەڤ یەک داویا تۆلهلدانا ئیرانێ یە د نهادا:”ئەڤ پەیام کو پێنج خۆلەکان پاش وەرگرتنێ ژ ئالیێ سۆئیسێ گها واشنتۆنێ، سەرۆک کۆمار رازی کر تو کارڤەدانان نیشان نەدە”.
