ئیسرائیل ئێریشی بنکەیا ئاسیمانی یا تی فۆر ل سووریێ دکە

ئیسرائیل ئێریشی بنکەیا ئاسیمانی یا تی فۆر ل سووریێ دکە

ئارتەشا سووریێ دوهی شەڤ ١٤/١/٢٠٢٠ راگهاند کو بالەفرێن جەنگی یێن ئیسرائیلێ بنکەیا ئاسیمانی یا تی فۆر ل کویراتیا خاکا سووریێ دە ئارمانج کریە.

ل گۆرەی راگهاندنێن سووری یێن سەر ب رەژیما بەشار ئەسەد ڤە بالەفرێن جەنگی یێن ئیسرائیلێ ئێریشی بنکەیا ئاسیمانی یا تی فۆر ل کەرتێ رۆژهلاتێ باژارێ حمسێ کریە و چەندین مۆشەک ل ڤێ بنکەیێ دانە و بوویە سەدەما زیانێن مادی ل ڤێ بنکەیێ.

رامی عبدالرحمان رێڤەبەرێ چاڤدێریا مافێن مرۆڤان ل سووریێ ژ بۆ فرانس پرێسێ راگهاند: “ل بنکەیا تی فۆر هێزێن رەژیما سووریێ، هێزێن ئیرانێ و هەروها هەژمارەک ژ شێورمەندێن سەربازی یێن رووسی ژی تێدە هەنە”.

ئەڤ بنکەیا ئاسیمانی یاکو دکەڤە کویراتیا خاکا سووریێ دە پێش نها ژی چەندین جاران ژ ئالیێ بالەفرێن جەنگی یێن ئیسرائیلێ ڤە هاتیە بۆردۆمانکرن.

ل سەر ڤێ یەکێ رەژیما سووریێ راگهاند کو ئێریش ل سەر بنکەیا تی فۆر ب بکارئینانا بالەفرێن بێ پیلۆت و مۆشەکان ڤە هاتیە ئەنجامدان کو هێزا ئاسیمانی یا سووریێ بەرسڤا ئێریشێ دایە و چەندین مۆشەک ژناڤبرینە.