ئه‌ردۆگانی دوشه‌ش د ده‌ستێ داوودئۆغلوی دا كوشت

ئه‌ردۆگانی دو شه‌ش هێلا د ده‌ست داوودئۆغلوی دا

سه‌رۆك كۆمارێ تركیا ل سه‌ر دوورخستنا دژبه‌رێن خوه‌ به‌رده‌وامه‌ و د نووترین بریار دا، پارتیا ئه‌حمه‌د داوودئۆغلوی كو ل داویا سالا رابووری هاتیه‌ دامه‌زراندن، ژ هه‌لبژارتنێن بهێت دوور كر.

ل ژێر فه‌رمان و راسپارده‌یێن ره‌جه‌ب ته‌یب ئه‌ردۆگان سه‌رۆك كۆمارێ تركیا و سه‌رۆكێ پارتیا داد و گه‌شه‌پێدان ئاكه‌پێ، ئه‌نجوومه‌نا بلند یا هه‌لبژارتنێن تركیا لیستا ناڤێن وان پارتیان ئه‌شكه‌ره‌ كر كو دێ ته‌ڤلی هه‌لبژارتنێن بهێت یێن تركیا بن، پارتیا «ئاینده» یا ئه‌حمه‌د داوودئۆغلوی ل داویا سالا رابووری دامه‌زراندی د ناڤ دا نینه‌ و رێ پێ ناهێته‌ دان به‌شداری هه‌لبژارتنان ببیت.

ئه‌نجوومه‌نا هه‌لبژارتنێن تركیا ناڤێن 15 پارتیان راگهاندینه‌ كو دێ هه‌ڤركیێ د هه‌لبژارتنێن بهێت دا كه‌ن، پارتیا ئه‌حمه‌د داوودئۆغلو ژی ب هێجه‌تا نه‌بوونا مه‌رجێن پێدڤی ژ هه‌ڤركیێ دوور كریه‌ و دایه‌ زانین كو ئه‌و پارتی ته‌ڤلی پرۆسه‌یا هه‌لبژارتنان نابیت.

ئه‌نجوومه‌نا هه‌لبژارتنان ده‌ست نیشان كر‌، تنێ پارتیێن ب 6 مه‌هان به‌ری مه‌ها كانوونا ئێكێ یا سالا 2020ێ هاتینه‌ دامه‌زراندن و ده‌ست ب خه‌بات و چالاكیێن خوه‌ كرین، دێ ته‌ڤلی هه‌لبژارتنان بن.

ب ڤێ چه‌ندێ پارتیا «ئاینده» كو ئه‌حمه‌د داوودئۆغلو دگه‌ل 153 ئه‌ندام و رێهه‌ڤالێن خوه‌ ل مه‌ها كانوونا ئێكێ یا سالا رابووری دامه‌زراندی بۆ نینه‌ به‌شداری هه‌لبژارتنان ببیت، ئه‌ڤ مه‌رج ژی كو ل ژێر فه‌رمان و راسپارده‌یا ره‌جه‌ب ته‌یب ئه‌ردۆگان هاتیه‌ دانان، راسته‌ راست ئه‌حمه‌د داوودئۆغلو و رێ هه‌ڤالێن وی دكه‌ته‌ ئارمانج.

داوودئۆغلو سه‌رۆك وه‌زیرێ 36ێ یێ تركیا بوو و هه‌موه‌خت سه‌رۆكێ پارتیا داد و گه‌شه‌پێدانێ بوو، ب ئه‌گه‌را دووركه‌فتنا ئاكه‌پێ ژ بنه‌مایێ ژ بۆ هاتیه‌ دامه‌زراندن، ئه‌و ل سالا 2016ێ ژێ ڤه‌قه‌تیا، هه‌ژماره‌كا‌ سه‌ركرده‌یێن دی یێن ئاكه‌پێ ل دووڤ وی ئاكه‌په‌ ب جهـ هێلان.

بزاڤێن داوودئۆغلوی یێن دامه‌زراندنا پارتیه‌كا‌ نوو هه‌موه‌ختا بزاڤێن پارتیا ده‌ستهلاتدار دهاتن كو دخواست ب چ ئاوایه‌كی ئه‌ڤ بزاڤه‌ ب ئه‌نجام نه‌گه‌هن و پارتیا داوودئۆغلو  نه‌هێت دامه‌زراندن.

ئه‌حمه‌د داوودئۆغلو ل داویێ و ب تایبه‌ت ل 13/12/2019ێ پارتیا «ئاینده» وه‌كو پارتیه‌كا دژبه‌ر ژ بۆ پارتیا داد و گه‌شه‌پێدان یا ره‌جه‌ب ته‌یب ئه‌ردۆگان دامه‌زراند.

ئه‌ردۆگان ژی هه‌تا نها ل داوودئۆغلوی و رێ هه‌ڤالێن خوه‌ یێن به‌رێ كو ژ پارتیا وی جودا بووینه‌ خۆش نه‌بوویه‌ و بریارا دوورخستنا پارتیا داوودئۆغلوی ژ هه‌لبژارتنێن بهێت یێن تركیا ئه‌ڤ چه‌نده‌ سه‌لماندیه‌.

ئه‌ردۆگان د گۆتاره‌كا خوه‌ دا وه‌ها به‌حسا داوودئۆغلو و هه‌ڤالێن وی كربوو: «مه‌ ئه‌ڤ بزاڤ ژ گه‌له‌ك ئه‌ندامێن ئاكه‌پێ دیتینه‌، گه‌له‌ك گرۆپ هاتنه‌ ئاڤاكرن، ئه‌ڤ گرۆپ چ جاره‌كێ ژ بۆ مه‌ خه‌م نه‌بووینه‌، هه‌ر وها ئه‌م ب ئه‌ندامێن خوه‌ یێن نوو خوه‌شحالن».

پارتیا داوود ئۆغلو و پارتیێن دی یێن ئۆپۆزسیۆنا تركیا ب ژڤان بوون، د هه‌لبژارتنێن بهێت دا، دربه‌كێ مه‌زن ل پارتیا ئه‌ردۆگان بده‌ن، ب تایبه‌ت كو د هه‌لبژارتنێن داویێ دا شكه‌ستن ل چه‌ندین باژارێن مه‌زن وه‌ك‌ ئه‌نقه‌رێ و سته‌نبۆلێ ئینابوو.