ئەلجەبیر: ئیران مەزنترین پالپشتا تەرۆرێ یە د جیهانێ دە

ئەلجەبیر: ئیران مەزنترین پالپشتا تەرۆرێ یە د جیهانێ دە

عادل ئەلجەبیر، وەزیرێ شێورمەند د پرسێن دەرڤە یێن عەرەبستانا سعوودی، رۆژا سێ شەمی ٢١/١/٢٠٢٠ان د ناڤا پارلەمەنتۆیا ئەورۆپایێ دە گۆت کو ئیران مەزنترین ولاتێ پشتەڤانکەرێ تەرۆرێ یە د جیهانێ دە.

ئەلجەبیر راگهاند: “سعوودیە هەیا ژناڤبرنا تەرۆریسمێ، وێ بەردەوام بە د بزاڤا خوە یا ل دژی تیرۆرێ دە”.

ئەلجەبیر، سەبارەت یەمەنێ ژی ئاخفت و راگهاند کو ‌حوسیان دەرهەق گەلێ یەمەنێ دە جینایەت ئەنجام دانە. وی راگهاند: “سعوودیێ تو شەر ل یەمەنێ دەست پێ نەکرینە، بەلکو ئەڤ حوسی بوون دەست ب شەری کری”.

ل گۆرەی ئاخافتنا ئەلجەبیر، چەکدارێن حوسی ٣٠٠ مووشەک و ١٠٠ بالەفرێن بێ پیلۆت بکارئانینە ژ بۆ ئێریشێن خوە یێن ل سەر عەررەبستانا سعوودی. لێ لسەر ڤێ یەکێ رە وی ژ ئالیکاریێن ١٤ ملیار دۆلاری یێن ولاتێ خوە ژ بۆ بەرەف پێش برنا یەمەنێ خەبەر دا.

ناڤبری تەکەز کر کو ئیران مەزنترین ولاتێ پشتەڤانێ تەرۆرێ یە د جیهانێ دە و راگهاند:” شیعەیان ل ئیرانێ، ئیراقێ و لبنانێ ل دژی سیاسەتێن تەهرانێ خوەپیشاندان کرینە.

لسەر پرسا ئەورۆپایێ ئەلجەبیر، راگهاند کو ئەورۆپایێ ل ناڤچەیا مە دە رۆلەکە سەربازی و ئابووری یێ هەری گرینگ هەیە لێ ئاخافتنا خوە ئاراستەی ئەندامێن پارلەمەنتۆیا ئەورۆپایێ کر و گۆت: زانیاریێن ئەورۆپایێ لسەر سعوودیێ پشتبەستنێ ل سەر پرۆپاگندەیان دکە.

وەزیرێ شێورمەند د پرسێن دەرڤە یێن عەرەبستانا سعوودی دە راگهاند کو تو کەسەکێ ژێر ١٨ سالیێ دا ل سعوودیێ نەهاتیە بدارڤەکرن. هەروها راگهاند کو : ئەم ولاتەک خوەدی دەسهلاتا نەتەوینە کو رێ ب هەوە نادین دەرسان ب مە بدەن.

لسەر پرسا پەیوەندیێن د ناڤبەرا ئەنقەرێ و ریازێ ژی ئەلجەبیر، راگهاند: هەرچەند ئەم ل دژی مایتێکرنێن ترکیێ ل ناڤچەیێ نە و ڤان مایتێکرنان رەخنە دکین، لێ مە دگەل ترکیێ دە تێکلداری هەیە.