وەزارەتا بەرگرییا ئەمەریکایێ ئیرۆ راگه‌هاند كو ئه‌و نها گۆتوبێژا دانانا سیسته‌مێن دژه‌ مووشه‌كان ل پێگەهێن خوە یێن سه‌ربازی ل ئیراقێ دکەن.

کەنالێ فۆكس نیۆز یێ ئەمەریکی ب ڤەگوهاستن ژ هنده‌ك چاڤکانیێن وەزارەتا بەرگرییا ئەمەریکایێ پێنتاگۆنێ راگه‌هاندییە کو پشتی ئێریشا مووشەکی یا ئیرانێ بۆ سەر پێگەهێن ئەمەریکایێ ل ئیراقێ،  بریار هاتییە ستاندن کو سیستەمێ بەرگرییا ڤان پێگەهان بهێته‌ بهێزتر کرن.

ئەڤ بابەتە پشتی ڤێ یەکێ تێ باس کرن کو ل رۆژێن ڤێ داویێ دا، هندەک راپۆرت به‌لاڤه‌ بوون کو تێدا باس ل بریندار بوونا هه‌ژماره‌ك ژ سەربازێن ئەمەریکی یێن ل پێگەها عەین ئەسەد ل رۆژئاڤایێ ئیراقێ دکه‌ن، ئەڤ بریندارە ژ ئەنجاما وێ ئێریشا مووشەکی یا ئیرانێ بوون کو ل رۆژا 8/1/2020ێ ل سەر ڤێ پێگەهێ ئەنجام داینه‌.

ل رۆژا 8/1/2020ان، ئیرانێ وەکە تۆلهلدانەک ل دژی کوشتنا قاسم سولەیمانی، فەرماندارێ سوپایێ قودس یێ سوپایێ پاسدارێن ئیرانێ کو ب ئێریشا بالەفرێن بێ پیلۆت یێن ئەمەریکایێ ل نێزیكی بالەفرخانەیا بەغدایێ هاتبوو کوشتن، پێگەهێن ئەمەریکی ل ناڤا ئیراقێ دا ب مووشەکان ئارمانج کرن.