ھێزێن ئەمەریکی ل سووریێ جارەکا دی رێ ل پێش ھێزێن رووسی گرت و رێ نەدا ئەو دەرباسی باژارۆکێ تل تەمەرێ ببن.
نێرینگەها سووری یا مافێن مرۆڤان بەلاڤ کر، دەما کاروانەکێ پۆلیسێن سەربازی یێن رووسی ل سەر ریا نیڤدەولەتی یا M4 بەر ب باژارۆکێ قامشلۆ ڤە دچوو، ھێزەکا ئەمەریکی ل باژارۆکێ تل تەمرێ رێ ل پێشیا وێ گرت و نەهێلا ئەو ھێزا رووسی دەرباس بیت و رێکا خوە بەر ب قامشلۆ تەمام بکەت.
ل گۆر نەرینگەهێ، ئەڤ یەک د دەمەکێ دا دهێت، ھێزێن ئەمەریکی کار ل سەر بەرفرەھکرنا بارەگەھا خۆ یا سەربازی ل تل بەیدەرا نێزیکی تل تەمرێ دا دکەن.
ئەڤە جارا ئێکێ نینە کو ھێزێن ئەمەریکی ل رۆژاڤایێ کوردستانێ رێ ل پێش پۆلیسێن سەربازییێن رووسی دگرن، رۆژا ٢١ێ ڤێ مەھێ ژی ھێزەکا ئەمەریکی رێ ل ھێزەکا رووسی گرت و نەهێلا دەرباسی ھەرێما دێرکێ ببە و نەچار بوو و ڤەگەریت قامشلۆ.
دهێتە زانین کو نھا ھێزێن ئەمەریکی زێدەتر ل وان ناڤچەیا نە کو پەترۆل لێ ھەیە، ئەڤە ژی ل نێزیک سینۆرێ باشوور و رۆژاڤایێ کوردستانێ نە کو دکەڤنە ناڤچەیا رمێلان، قامشلۆ و باژارێن دی یێن کوردی.
گەلەک جاران روو ددە، پۆلیسێن سەربازییێن رووسی ھەول ددەن نێزیکی وان ناڤچەیان ببن، لێ بەلێ ژ ئالیێ ھێزێن ئەمەریکی ڤە رێ ل بەر وان تێ گرتن و نوونەرێ تایبەتی یێ ئەمەریکایێ بۆ کاروبارێن سووریێ دبێژە، مە ھەماھەنگیا سەربازی ل گەل رووسیایێ ھەیە بۆ کو رێ ل ھەمبەر ھاتنا وان ھێزان بگرن.
