ترامپ ب توویتەکێ بەرسڤا داخوازیا زەریف ددە

ترامپ ب توویتەکێ بەرسڤا داخوازیا زەریف ددە

دۆنالد ترامپ سەرۆک کۆمارێ ئەمەریکا رۆژا یەک شەمی ٢٦/١/٢٠٢٠ان د ئەکوانتا خوە یا توویتەرێ دە، داوی پێشنیارا محمد جواد زریف وەزیرێ کارۆبارێن دەرڤە یێن ئیرانێ ژ بۆ دانوستاندنا دگەل ئەمەریکا دە ب مەرجا راکرنا دوورپێچان ژ ئالیێ ئەمەریکاڤە ل سەر ئیرانێ رەد کر.

ترامپ د توویتا خوە دە نڤیساند:” وەزیری دەرڤە یێ ئیرانێ دبێژە وەلاتێ وی دێ دانوستاندنێ دگەل ئەمەریکا بکە، لێ بەلێ ب مەرجێ راکرنا دوورپێچان ل سەر ئیرانێ…نەخێر سوپاس”.

 ترامپ توویتا جەواد زەریف کو ب زمانێ فارسی هاتبوو نڤیساندن د رۆپەلا خوە دە پارڤەکر.

وەزیرێ دەرڤە یێ ئیرانێ د دیدارەکە رۆژنامەڤانی دە دگەل کۆڤارا “Der Spiegel” دە پاش کوشتنا قاسم سولەیمانی فەرماندارێ فەیلەقا قودس یا سوپایێ پاسدارێن ئیرانێ، دانوستاندنێن دگەل واشنتۆنێ رەد دکە و دبێژە ئەمێ ب تەنێ ب یەک مەرج دانوستاندنێ دگەل ئەمەریکا دە بکین، ئەو مەرج ژی ئەڤە کو ئەمەریکا سەرەدەریا خوە دگەل ئیرانێ بگوهەرە و دوورپێچێن سەر ئیرانێ راکە.

زەریف د ڤێ دیدارێ دە راگهاند: “ژ بۆ مە نەیا گرینگە چ کەسەک ل ناڤا کۆچکا سپی دە روونشتیە، یا گرینگ ئەڤە کو ئەو ب تو ئاوا تەڤدگەرە. حکوومەتا دۆنالد ترامپ دکارە رابردۆیا خوە راستڤەکە، دوورپێچێن ل دژی ئیرانێ هلگرە و جارەکە دن ڤەگەرە سەر مێزا دانوستاندنێ. ئەم هێژان ل سەر مێزا دانوستاندنێ نە. ئەون کو مێزا دانوستاندنێ بجی هشتی”.

 

پوستێن ھەمان بەش