رووسیا دێ سینۆرێ خوه ل همبه‌ر چینێ دائێخیت
ڤایرۆسا كۆرۆنایێ كو ده‌ما چه‌ندین رۆژانه ل باژارێ ووهان یێ چینێ ده‌ركه‌تییه، ئیرۆ هات راگهاندن كو هه‌یا نها ئه‌ڤ ڤایرۆسێ خه‌ته‌ر گهایه 23 ولاتان.
پشتی كو هه‌یا دوهـ رۆژا چارشه‌میێ ڤایرۆسا كۆرۆنایێ ل 17 ولاتێن جیهانێ به‌لاڤه‌بوویی، ئیرۆ هه‌ر یه‌ك ژ ولاتێن هندستانێ، فلپینێ، ڤێتنام و فنله‌ندایێ ژی راگهاندن كو حاله‌تێن تووشبوونێ ل جه‌م وان هاتنه تۆمار كرن، رووسیا فه‌ده‌رال ژی نیازا خوه ژ بۆ داخستنا سینۆرێ ل گه‌ل چینێ ژ ترسا ڤایرۆسێ راگهاند.
وه‌زاره‌تا ساخله‌مییا هندستانێ ئیرۆ د به‌یانه‌كه فه‌رمی ده، دیار بوونا حاله‌ته‌كێ كۆرۆنایێ ل ویلایه‌تا كیرالا یا باشوورا ولات راگهاند كو ل جه‌م خوه‌ندكاره‌كی زانكۆیا ووهان ده‌ركه‌تییه.
هه‌موه‌خت ولاتێن ڤێتنام، فینله‌ندا و فلپینێ ژی ئه‌شكه‌ره كرن كو ڤایرۆسا كۆرۆنایێ گهایه ولاتێن وان و هنه‌ك حاله‌ت هه‌نه، لێ به‌لێ هه‌موو خستنه بن چاڤدێرییا نۆشداری.
ل گۆر داوین ئامارا چینێ، هه‌ژمارا تووشبوویان ب ڤایرۆسا كۆرۆنایێ هه‌یا نها گهایه 7783 حاله‌تان، 170 كه‌سان جانێ خوه ب وێ سه‌ده‌مێ ووندا كرییه، 44 هه‌زار كه‌س ژی گۆمانه‌كه هه‌ری زێده هه‌یه كو ل جه‌م وان هه‌به.
ژ رۆژا ده‌ركه‌تنا ڤایرۆسا كۆرۆنایێ ل باژارێ ووهان كو 18 ملیۆن مرۆڤ لێ دژین و هه‌یا نها، ئه‌ڤ ڤایرۆسا خه‌ته‌ر گهایه 23 ولاتان، ژ وان، ئه‌مه‌ریكا، كه‌نه‌دا، ئوسترالیا به‌ریتانیا و فره‌نسا و ئیماراتا ئه‌ره‌بی و هه‌ژماره‌كه ولاتێن دن.
