د به‌رده‌وامییا شه‌ر و په‌ڤچوونێن ل پارێزگه‌ها ئدلبێ یا باكورێ سووریێ دا كو ره‌وشه‌كا كاره‌ساتبار دروست كرییه‌، مووشه‌كه‌كا رژێما سووریێ، 3 خێزان پێكڤه‌ كوشتن.

ئێریشا هێزێن رژێما سووریێ و هه‌ڤپه‌یمانا وێ رووسیا فه‌ده‌رال ل سه‌ر پێگه‌هێن ئۆپۆزسیۆنێ ل سنۆرێ ئدلبێ به‌رده‌وامه‌، خه‌لكێ ئدلبێ كو ب ئه‌گه‌را شه‌ری ب به‌رده‌وامی كۆچبه‌ری ناڤچه‌یێن ئارام دبن، لێ به‌لێ ژ ئێریشان رزگار نابن.

ئه‌ڤرۆ رۆژا شه‌مبی 8/2/2020ێ ترومبێله‌كا ژ جۆرێ «ڤان» كو ئه‌ندامێن 3 خێزانێن ئدلبێ تێدا بوون و ب نیازبوون به‌ر ب ناڤچه‌یێن ئارام بچن، د رێ دا كه‌فته‌ به‌ر مووشه‌كه‌كا رژێما سووریێ و چ كه‌سه‌ك ژێ رزگار نه‌بوو.

نه‌رینگه‌ها سووریێ یا مافێن مرۆڤان ئاشكرا كر، ئه‌وێ ترومبێلا مینی پاس 3 خێزان تێدا بوون و پرانییا قوربانیێن وێ ژن و زارۆ بوون.

هه‌ر وها ده‌ست نیشان كر، مووشه‌كا كو ب وێ مینی پاسێ كه‌فتی، رژێما سووریێ ژ سه‌ر بانێ ترومبێله‌كا «پیك ئاپ» ئاڤێتییه‌ و مینی پاس راسته‌ راست هه‌ده‌ف كرییه‌.