وه‌زاره‌تا به‌رگریێ یا ئه‌فغانستانێ ئاشكرا كر، 172 چه‌كدارێن ته‌ڤگه‌را تالیبانێ ل رۆژئاڤایا ولات خوه‌ راده‌ستی هێزێن ئه‌وله‌هیێ كرن.

وه‌زاره‌تا به‌رگریێ یا ئه‌فغانستانێ ئه‌ڤرۆ رۆژا سێشه‌مبی 11/2/2020ێ راگه‌هاند، ل هه‌ردوو ویلایه‌تێن «غۆر و هه‌رات» یێن رۆژئاڤایا ئه‌فغانستانێ، هه‌ژمارا 172 چه‌كدارێن ته‌ڤگه‌را تالیبانێ خوه‌ راده‌ستی سوپای و هێزێن ئه‌وله‌هیێ كرن.

ده‌ست نیشان كر، وان چه‌كداران جودابوونا خوه‌ ژ ته‌ڤگه‌را تالیبانێ راگهاندیه‌ و روو كرینه‌ هێزێن ئه‌وله‌هیێ و خوه‌ راده‌ست كرینه‌.

وه‌زاره‌تا به‌رگریێ هه‌ر ل ڤێ ده‌ربارێ دا ئاماژه‌ كر، 3 چه‌كدارێن كو ئه‌ڤرۆ خوه‌ راده‌ست كرین، فه‌رماندارێن ناڤچه‌یانه‌ د ته‌ڤگه‌را تالیبانێ دا.

ل گۆر وه‌زاره‌تا به‌رگریێ یا ئه‌فغانستانێ، د ده‌ما 2 مه‌هێن رابووری دا، 582 چه‌كدارێن ته‌ڤگه‌را تالیبانێ خوه‌ راده‌ست كرینه‌ و ڤێ یه‌كێ كاریگه‌رییه‌كا ئه‌رێنی ل سه‌ر پێڤاژۆیا ئاشتیێ هه‌بوویه‌.