سه‌رۆكێ حكوومه‌تا باشوورێ كوردستانێ، ئیرۆ ل گه‌ل وه‌زیرێ كارێن ده‌رڤه یێ رووسیا فه‌ده‌رال جڤیا و داخواز ژێ كر كو چاره‌سه‌رییا دۆزا كوردێن رۆژئاڤا كوردستانێ بهێ كرن.
ل په‌راوێزا به‌شدارییا خوه ل كۆربه‌ندا ئه‌وله‌هییا ناڤنه‌ته‌وه‌یی ل میۆنشێنێ، ئیرۆ رۆژا شه‌می 15/2/2020ێ مه‌سروور بارزانی سه‌رۆكێ حكوومه‌تا باشوورێ كوردستانێ، ل گه‌ل سه‌رگی لاڤرۆڤ وه‌زیرێ كارێن ده‌رڤه یێ رووسیا فه‌ده‌رال جڤیا.
مه‌سروور بارزانی ل سه‌ر هه‌سابا خوه یا تویته‌رێ نڤیساندییه: «مه دوپاتی ل ئارام كرنا ره‌وشا ناڤچه‌یێ ب تایبه‌ت ل سووریێ كر، من داخوازییا خوه ژ بۆ رووسیا دوپات كر كو ناڤگینیێ ژ بۆ چاره‌سه‌ر كرنا پرسێن ئالۆز یێن سووریێ بكه‌ت ب لبه‌رچاڤ گرتنا مافێن هه‌موویان ب كوردێن رۆژئاڤا یا كوردستانێ ڤه».
كۆربه‌ندا ئه‌وله‌هییا ناڤنه‌ته‌وه‌یی یا میونشنێ دوهـ رۆژا ئینی 14/2/2020ێ گه‌را وێ یا 56ێ ده‌ست پێ كر، د كۆربه‌ندا ئیسالێ دا پێتر ژ 500 كه‌ساتیێن بریار بده‌ست یێن جیهانێ تێدا به‌شدارن، ل ڤان دو رۆژان گۆتوبێژێن سه‌ركرده‌یێن ولاتان ل ده‌ربارا قه‌یرانێن نها روو ب رووی ئه‌وله‌هییا جیهانێ دبن، ب تایبه‌ت ئه‌و خه‌ته‌رێن ل سه‌ر ئه‌ورۆپا و ولاتێن رۆژئاڤا هه‌نه.
