ئالۆزیێن دناڤبەرا ئارتێشا سووریێ و ئارتێشا ترکیێ بەردەوامن

ئالۆزیێن دناڤبەرا ئارتێشا سووریێ و ئارتێشا ترکیێ بەردەوامن

پشتی پێشڤەچوونێن بەردەوام یێن ئارتێشا رەژیما سووریێ و کۆنترۆلکرنا ٣٢ دەڤەران ل سینۆرێ ھەلەبێ ئارتێشا سووریێ خالەکا سەربازی یا ترکیێ ل وێ دەڤەرێ بۆمبەباران کر و  ھەر ل وێ دەڤەرێ خالەکە دن ژی دۆرپێچ کر.

روانگەھا سووریا یا مافێن مرۆڤ بەلاڤ کرییە، پشتی کۆنترۆلکرنا تەڤاھیا رۆژاڤایێ ھەلەبێ ئارتێشا سووریا خالەکا سەربازی یا ترکیێ ل گوندێ شێخ عەقیل بۆمبەباران کر و د ئەنجامێ دە ھەژمارەک ژ سەربازێن ترکیێ بریندار بوون.

روانگەھێ بەلاڤ کرییە، ل گەل پێشڤەچوونێن ئارتێشا سووریێ ل سینۆرێ ھەلەبێ خالا چاڤدێرییا ئارتێشا ترکیێ ب ناڤێ عەندان ل رۆژاڤایا ھەلەبێ ژ ئالییێ ھکومەتێ ڤە ھاتییە دۆرپێچ کرن.

 ھاتییە بەلاڤکرن ژی کو د ٢٤ دەمژمێران دە ئارتێشا سووریێ کارییە  ٣٢ گوند و باژارۆکان ل سینۆرێ ھەلەبێ کۆنترۆل بکە. ئەڤ یەکەم جارە، پشتی سالا ٢٠١١یێ رژێما سووریێ دکارە تەڤاھییا رۆژاڤایا گوندەوارێ ھەلەبێ کۆنترۆل بکە. ل گۆر روانگەھێ ل گەل پێشڤەچوونێن ئارتیشا سووریێ ھەژمارا کۆچبەران ژی زێدە بوویە و د دەما ٢١ رۆژان دە پێتر ژ ٤٠٠ ھەزار کەس کۆچبەر بوونە.

پوستێن ھەمان بەش