كۆرۆنایێ زه‌نگا ترسێ ل ئیرانێ لێدا
ڤایرۆسا كۆرۆنایێ (COVID-19) گه‌هشتیه ئیرانێ و ترسه‌كا زێده ل جه‌م خه‌لكێ وێ چێبوویه، ژ به‌ر كو ئه‌و دزانن هێژان چ ده‌رمانه‌ك ژ بۆ چاره‌سه‌ربوونێ نه‌هاتیه دیتن.
دوهـ رۆژا چارشه‌مبێ 19/2/2020ێ وه‌زاره‌تا ساخله‌میا ئیرانێ راگهاند كو ڤایرۆسا كۆرۆنا ل باژارێ قوم یێ نێزیكی ته‌هرانێ ده‌ركه‌تیه و 2 كه‌س تووشبووینه، پشتی كو تێستێن وان پۆزه‌تیڤ ده‌ركه‌تین، ل ئێڤارا هه‌مان رۆژێ مرنا وان هه‌ردو تووشبوویان راگهاند.
به‌لاڤبوونا ڤایرۆسێ ترس ل جه‌م خه‌لكێ ئیرانێ چێكریه و هه‌ر زوو ده‌ست ب ل به‌ر كرنا ماسكان كرینه، حكوومه‌تێ پێرابوونێن بله‌ز ژ بۆ به‌رهنگاربوون و كۆنترۆلا ڤایرۆسێ وه‌رگرتینه ب تایبه‌ت ل باژارێ قوم.
ل گۆر وه‌زاره‌تا ساخله‌میا ئیرانێ و ب فه‌رمانا راست راست یا سه‌رۆكێ ئیرانێ حه‌سه‌ن رۆحانی، ده‌وام ل خواندنگه‌هـ و زانینگه‌هێن باژارێ قوم هاتیه راوه‌ستاندن، هه‌روه‌ها خالێن كۆنترۆلێ ل ناڤبه‌را باژارێ قوم و ته‌هرانێ هاتینه دژوار كرن.
هه‌روه‌ها ب فه‌رمانا حه‌سه‌ن رۆحانی جڤاته‌ك ژ بۆ به‌رهنگاربوونا كۆرۆنایێ هات دامه‌زراندن و 2 نه‌خوه‌شخانه ژ بۆ تووشبوویان هاتنه ته‌رخان كرن.
ل گۆر داتایێن فه‌رمی یێن چینێ، هه‌تا نها 75752 كه‌س ته‌نێ ل چینێ تووشی كۆرۆنایێ بووینه، 2130 كه‌سان جانێ خوه ژ ده‌ست دانه، ژبلی چینێ كۆرۆنا ل 29 ولاتێن دی به‌لاڤه‌بوویه.
