كۆمسیۆنا مافێن مرۆڤی یا ئیراقێ ئه‌ڤرۆ ئامارا سه‌رجه‌م قوربانیێن خوه‌پێشاندانێن ئیراقێ به‌لاڤ كر و ل گۆر وێ، 566 كه‌س هاتنه‌ كوشتن.

كۆمسیۆنا مافێن مرۆڤی یا ئیراقێ كو ژ ده‌ستپێكا خوه‌پێشاندانێن ئیراقێ ل مه‌ها ئۆكتۆبه‌را سالا رابووری 2019ێ چاڤدێرییا ره‌وشا خوه‌پێشاندانان و قوربانیێن وێ دكه‌ت، ئه‌ڤرۆ رۆژا پێنجشه‌مبێ 20/2/2020ێ راگهاند، ژ ده‌ستپێكا خوه‌پێشاندانان، 566 كه‌س هاتنه‌ كوشتن و 24 هزار كه‌س بریندار بوونه‌.

كۆمسیۆنا مافێن مرۆڤان ده‌ست نیشان كر، تنێ د 2 حه‌فتیێن رابووری دا، 10 كه‌س هاتنه‌ كوشتن كو رۆژنامه‌ڤانه‌ك و 9 چالاكڤان بوون.

هه‌ر ل گۆر ئامارا كۆمسیۆنا مافێن مرۆڤان، 79 خوه‌پێشانده‌ر ب ده‌ستێ كه‌سێن نه‌ناسكری هاتنه‌ ره‌ڤاندن، ژ سه‌رجه‌ما وان 22 هاتنه‌ ئازاد كرن.

 هه‌روه‌ها 2768 كه‌س ژ ئالیێ ده‌وله‌تێ ڤه‌ هاتبوونه‌ بن چاڤ كرن، پرانییا وان هاتنه‌ ئازاد كرن، ته‌نێ 38 مانه‌ د زیندانان دا.