خەلکێ باژارێ قامشلۆ بۆ دەما ١٥ رۆژانە گازندان ژ نەبوونا مازۆت و خازێ دکەن، بێیی کو ئەڤ کریزە بهێتە چارەسەر کرن.
ھندەک وەلاتی دبێژن کو ژ سالا ٢٠١١ێ و حەتا رۆژا ئەڤرۆ ئەڤ رەوشە وهایە، ھەروھا بانگ ل کەسێن بەرپرس دکەن کو سووتەمەنیێ ژ بۆ وان پەیدا بکەن.
نەبوونا مازۆتێ و غازێ بوویە چیرۆکا رۆژانە یا خەلکێ باژارێ قامێشلۆ. بۆ دەما نێزیکی ١٥ رۆژانە باژێر د کریزەکا سووتەمەنیێ دا دەرباس دبیت بێیی کو ئالیێن بەرپرس چارەیەکێ ژ بۆ ڤێ کریزێ پەیدا بکەن. گەلەک مال ژبەر نەبوونا مازۆتێ سۆپەیێن وان ناهێن هەلکرن ، ھەروھا ھندەک مالبات خوارنا خوە ل سەر پاپۆر یان ژی ل سەر ئاگرێ داران چێدکەن.
رێڤەبەریا دەستەیا سووتەمەنیێ دیار دکەت کو ھەژمارا مەزن یا نیشتەجیان سەدەما ڤێ کریزێیە کو نێزکی ٧٠ ھەزار مالبات ژ بلی پەنابەران ل باژێر دژین.
هەڤدەم کو ٧٠% ژ پەترۆلا سووریێ، ل دەڤەرا رۆژاڤایێ کوردستانێ دهێتە بەرهەم ئینان، لێ پشتی سالا ٢٠١١ێ سووتەمەنی نەمازە مازۆت وو غاز ل رۆژاڤا کێم بوویە و وەلاتیێن رۆژاڤا گەلەک زەھمەتیان د وارێ پەیداکرنا سووتەمەنیێ دە دکێشن، ب تایبەت د وەرزێ زڤستانێ دا.
