حكوومه‌تا باشوورێ كوردستانێ، ئاماده‌كاریێن ته‌مام ژ بۆ رێگرتنێ ل هاتنا ڤایرۆسا كۆرۆنایێ (COVID-19) كرینه، پشتی كو ل كۆمارا ئیسلامییا ئیرانێ به‌لاڤه‌بوویی.
لژنه‌یا بلند یا به‌رهنگاربوونا ڤایرۆسا كۆرۆنایێ ل باشوورێ كوردستانێ، ئیرۆ رۆژا شه‌مبی 22/2/2020ێ كۆمبوو و پاش كۆمبوونێ، رێبه‌ر ئه‌حمه‌د وه‌زیرێ ناڤخوه یێ حكوومه‌تا باشوور راگهاند، حكوومه‌تێ هه‌موو ئاماده‌كاری ژ بۆ رێگریكرنێ ل هاتنا ڤایرۆسا كۆرۆنایێ كرینه.
رێبه‌ر ئه‌حمه‌د ده‌ست نیشان كر، حكوومه‌ت هێچ تشته‌كی ل وه‌لاتیێن خوه ناڤه‌شێریت و گۆت: «هه‌ر تشته‌كێ ل ده‌رڤه‌یی سازیێن فه‌رمی یێن حكوومه‌تێ بهێته به‌لاڤ كرن، راستی ژ بۆ نینه».
وه‌زیرێ ناڤخوه داخواز ژ گه‌لێ باشوورێ كوردستانێ كر، هه‌ڤكارییا سازیێن حكوومه‌تێ بكه‌ن و ره‌تكر كو چ حاله‌ته‌كێ تووشبوونێ ب ڤایرۆسا كۆرۆنایێ ل هه‌رێما باشوورێ كوردستانێ هاتبیته تۆمار كرن.
د مژاره‌كا دی دا، وه‌زیرێ ناڤخوه سۆز دا كو حكوومه‌ت چاڤدێرییا بازاری بكه‌ت و رێ نه‌ده‌ت كه‌لوپه‌ل و پێدڤیێن پزیشكی بهێن گران كرن یان ژ بۆ ده‌رڤه‌ی وه‌لاتی بهێن هنارتن.
