سه‌در ژ «قومێ» ڤه‌گه‌ری و پشكنین بۆ نه‌هاته كرن
رێبه‌رێ ره‌وتا سه‌در یا شیعی موقته‌دا سه‌در، ژ باژارێ قوم یێ ئیرانێ ڤه‌گه‌ریا كو ده‌ما چه‌ند رۆژانه كۆرۆنا لێ به‌لاڤه‌بوویه و ل وه‌ختا گه‌هشتنا وی بۆ ئیراقێ ، نه‌كه‌فته بن چاڤدێرییا پزیشكی و پشكنینان.
موقته‌دا سه‌در رێبه‌رێ، ئه‌ڤرۆ رۆژا شه‌مبی 22/2/2020ێ دگه‌ل زێره‌ڤانێن خوه ژ باژارێ قوم یێ ئیرانێ ڤه‌گه‌ریا ئیراقێ و هه‌ر راست ل گه‌ل گه‌هشتنا خوه ژ بۆ نه‌جه‌فێ، سه‌ره‌دانا مه‌زارێ ئیمامێ حسێن كر.
ڤایرۆسا كۆرۆنایێ به‌ری چه‌ند رۆژان ل باژارێ قوم یێ ئیرانێ به‌لاڤه‌بوویه، ل ده‌مه‌كی ئیراقێ سنۆرێ ل گه‌ل ئیرانێ وه‌ك رێیه‌كێ ژ بۆ به‌رهنگاربوونا ڤایرۆسێ گرتییه، لێ به‌لێ موقته‌دا سه‌در ب زێره‌ڤانێن خوه ڤه، هاتن ناڤا ئیراقێ و چ كه‌س و ئالییان ئه‌و نه‌خستن بن چاڤدێرییا 14 رۆژی كو ئه‌ڤ ده‌م پێدڤییه ژ بۆ كو بهێته زانین ئه‌گه‌ر مرۆڤ ب وی ڤایرۆسا كوژه‌ك تووشبوویه.
هاتنا موقته‌دا سه‌در ژ قومێ بۆ نه‌جه‌فێ كارڤه‌دان و نه‌رازیبوون ل جادده‌یا ئیراقێ ل په‌ی خوه ئینایه، ب تایبه‌ت ل تۆرێن جڤاكی كو وها ل سه‌ر نڤیساندینه، «سه‌در ژ دلێ كۆرۆنایێ ڤه‌گه‌ریا ئیراقێ، ئایا سه‌دری كۆرۆنا ل گه‌ل خوه ئینایه».
ل گۆر ئامارێن فه‌رمی یێن ئیرانێ، قوم یه‌كه‌م باژارێ ئیرانێ بوو كۆرۆنا لێ دیاربووی، هه‌تا نها 28 كه‌س تووشبوویی هه‌نه، ژ سه‌رجه‌ما وان، 5 كه‌سان جانێ خوه ژ ده‌ستدایه.
