په‌رله‌مانێ ئیراقێ ل به‌ره د ڤێ حه‌فتیێ دا كۆمببیت و ده‌نگی ل سه‌ر پێكهاته‌یا كابینه‌یا نوو یا حكوومه‌تا فیدرال بده‌ت.
په‌رله‌مانێ ئیراقێ ل رۆژا چارشه‌مبا بهێت 26/2/2020ێ دێ روونشتنه‌كا تایبه‌ت ب ده‌نگدانێ ل سه‌ر كابینه‌یا نوو یا حكوومه‌تا فیدرال سازكه‌ت كو ب سه‌رۆكاتییا محه‌مه‌د ته‌وفیق عه‌لاوی یه.
كۆمبوونا په‌رله‌مانێ ئیراقێ یا په‌ژراندنا حكوومه‌تا نوو ل به‌ربوو سبه رۆژا دوشه‌مبێ هاتبا ساز كرن، لێ به‌لێ حه‌سه‌ن كه‌عبی جێگرێ یه‌كه‌م یێ سه‌رۆكێ په‌رله‌مانێ ئیراقێ راگهاند كو ئه‌و روونشتن ژ بۆ رۆژا چارشه‌مبێ هاته پاشئێخستن.
ل رۆژا پێنجشه‌مبا رابووری، عادل عه‌بدولمه‌هدی سه‌رۆك وه‌زیرێ ده‌ست ژ كار كێشایی یێ ئیراقێ نڤیساره‌كا فه‌رمی ئاراسته‌ی په‌رله‌مانێ ئیراقێ كربوو و تێدا داخواز كربوو رۆژا دوشه‌مبێ ئانكو سوبه په‌رله‌مان كۆمبببیت و باوه‌ریێ بده‌ته حكوومه‌تا نوو.
لێ به‌لێ دوهی رۆژا شه‌مبیێ، محه‌مه‌د حه‌لبووسی سه‌رۆكێ په‌رله‌مانێ ئیراقێ دیار كر، هه‌تا ناڤێن وه‌زیرێن نوو و به‌رنامه‌یا كارێ حكوومه‌تێ نه‌گه‌هیت په‌رله‌مانی، ئه‌و نه‌شێن روونشتنا په‌رله‌مانی یا دانا باوه‌ریێ ب وێ حكوومه‌تێ ساز بكه‌ن.
ل گۆر ده‌ستوورا ئیراقێ روونشتنا په‌رله‌مانی ژ بۆ دانا باوه‌ریێ ب كابینه‌یا نوو ل سه‌ر داخوازا 50 په‌رله‌مانتاران یان سه‌رۆك كۆمار یان سه‌رۆكێ په‌رله‌مانی دهێت گرێدان، یان سه‌رۆك وه‌زیرێن ئیراقێ و ئه‌ڤ یه‌ك ژ سه‌رۆك وه‌زیرێ ده‌ست ژ كار كێشایی ڤه‌دگریت.
حكوومه‌تا نوو ژ بۆ وه‌رگرتنا باوه‌رییا په‌رله‌مانی، پێدڤییه 50+1 یا ده‌نگان ب ده‌ست بێخیت.
ل رۆژا چارشه‌مبا رابووری سه‌رۆك وه‌زیرێ راسپاردی محه‌مه‌د ته‌وفیق عه‌لاوی راگهاندبوو، وه‌زیرێ نوو ژ كه‌سێن سه‌ربخۆ و بێ لایه‌ن هاتینه هلبژارتن.
