یه‌كه‌م حاله‌تا تووشبوونێ ب ڤایرۆسا كۆرۆنایێ كۆڤید 19 ئیرۆ ل ئیراقێ هات ته‌سبیت كرن كو ل جه‌م خوه‌ندكاره‌كێ ئیرانێ یه و ل حه‌وزا نه‌جه‌فێ خوه‌ندنا خوه د دۆمینیت.
سوهه‌یل ئه‌ل ئه‌میری ناڤێ وی گه‌نجێ ئیرانی یه كو ئیرۆ رۆژا دوشه‌می 24/2/2020ێ ل باژارێ نه‌جه‌فێ یێ ئیراقێ وه‌ك یه‌كه‌م تووشبوویێ كۆرۆنایێ هات ده‌ست نیشان كرن، وی د په‌یامه‌كێ ده كو ل سه‌ر هه‌سابا خوه یا فه‌یسبووكێ پارڤه كرییه دبێژیت: «د هه‌ر ره‌وشه‌كێ ده ژ بۆ نه‌خوه‌شییا مه و ساخله‌مییا مه، ئه‌م سپاسییا خودێ دكن، ته‌نێ خودێ ب ره‌همه‌تا خوه ئه‌م چێكرنه و ساخله‌میێ دده مه و ژ مه دستینه و هه‌ر ئه‌و حه‌كیمه».
د به‌شه‌كا دن یا په‌یاما خوه ده گه‌نجێ تووشبوویی دبێژه: «ئه‌ز ئه‌و كه‌سم كو تووشی ڤایرۆسا كۆرۆنایێ بوومه، شیفا، ساخله‌می و مرن ب ده‌ستێ خودایه، هێڤی خوازم گه‌لێ ئیراقێ و ئه‌ز ژی ژ هه‌ر ده‌رد و به‌لایه‌كێ دوور بین، ژ به‌ر كو من ته‌هرانا ولاتێ خوه ژ بۆ نه‌جه‌فێ ب جی هشتییه، ژ بۆ كو ب دووڤ زانینێ بگه‌رم و خزمه‌تا ئیمامێ حوسێن بكم، من چ نیاز ژ بۆ ڤه‌گه‌رینێ نینه، ئیراق وه‌كه ولاتێ منه، نه‌جه‌ف وه‌كه باژارێ منه و گه‌لێ ئیراقێ ژی وه‌كه گه‌لێ خوه د هلبژێرم».
سوهه‌یل ئه‌ل ئه‌میری هه‌ر وها ده‌ست نیشان كر، «ئه‌و ل چ وه‌خته‌كی نه ترسیایه، به‌لكو ترسا وی ژ بۆ گه‌لێ ب رومه‌تێ ئیراقێ یه، ئه‌ز دوعایان دكم كو خودا ئیراقێ ژ هه‌ر ده‌رد و خه‌رابیه‌كێ بپارێزه ب تایبه‌ت ژ ڤێ ڤایرۆسێ».
گه‌نجێ تووشبوویی ب كۆرۆنایێ ل داوییا په‌یاما خوه دبێژه: «ئه‌ز داخوازێ دكم دوعایان ژ بۆ گه‌لێ ئیراقێ بكن ژ بۆ كو ژ هه‌موو ده‌رد و به‌لایان دوور به، خودێ ئیراقێ و گه‌لێ و وێ و زانایێن وێ، خوه‌ندكارێن زانینێ ب تایبه‌ت یێن سه‌ماحه‌تا مه‌رجه‌عا بلند عه‌لی سیستانی ب پارێزه».
