جێگرا رۆحانی تووش بوو

ژ 4 به‌رپرسێن مه‌زن یێن ئیرانێ یه‌ك ژ وان جانێ خوه‌ ژ ده‌ستدا

پاش تووشبوونا جێگرێ وه‌زیرێ ساخله‌مییا ئیرانێ ب ڤایرۆسا كۆرۆنایێ (كۆڤید 19) و هه‌روه‌ها مرنا بالیۆزێ ئیرانێ یێ ڤاتیكانێ ب وێ ڤایرۆسێ، ئیرۆ كۆرۆنایێ جێگرا سه‌رۆك كۆمار ژی تووش كر.

ئیرۆ رۆژا پێنجشه‌می 27/2/2020ێ، زانایێ ئۆلی و بالیۆزێ به‌رێ یێ ئیرانێ ل ڤاتیكانێ، (هادی خوسره‌وشاهی) كو ته‌مه‌ن 81 ساله‌ ب ئه‌گه‌را ڤایرۆسا كۆرۆنایێ جانێ خوه‌ ژ ده‌ست دا.

 ئاژانسا ته‌سنیم یا ئیرانێ ئه‌شكه‌ره‌ كر، دوهـ رۆژا چارشه‌می 26/2/2020ێ خوسره‌وشاهی ب گومانا تووشبوونێ ب ڤایرۆسا كۆرۆنایێ ژ بۆ چاره‌سه‌ركرنێ ژ بۆ نه‌خوه‌شخانه‌یا مه‌سیح دانیشڤه‌ر ل ته‌هرانێ هاتبوو ڤه‌گوهاستن.

هه‌ر ئیرۆ رۆژا پێنجشه‌می، تووشبوونا جێگرا سه‌رۆك كۆمارێ ئیرانێ مه‌عسوومێ ئیبتیكار ب كۆرۆنایێ هات پشت راست كرن.

سه‌رۆكاتییا ئیرانێ ئه‌شكه‌ره‌ كر، هه‌موو ئه‌ندامێن تیما مه‌عسوومێ ئیبتیكار پشكینین ژ بۆ هاتنه‌ كرن و رۆژا شه‌می ئه‌نجامێن پشكنینێن وان دێ ده‌ركه‌ڤن.

ل  رۆژا سێشه‌می یا رابووری، ئيرج حه‌ريرجي جێگرێ وه‌زیرێ ساخله‌مییا ئیرانێ، یه‌كه‌م به‌رپرسێ ئیرانێ بوو كو تووشی ڤایرۆسێ كۆرۆنایێ بووی.

هه‌ر ئیرۆ رۆژا پێنجشه‌می، تووشبوونا موجته‌با زولنوور نوونه‌رێ باژارێ قومێ ل ئه‌نجوومه‌نا شوورایا ئیرانێ ب ڤایرۆسا كۆرۆنایێ هات راگهاندن و د ڤیدیۆیه‌كێ دا، وی ئه‌شكه‌ره‌ كر كو ئه‌و نها ل بن چاڤدێرییا ساخله‌میێ یه‌.

پوستێن ھەمان بەش