سولتانی دربه‌ك ل حزبا خودێ دا

Ardoghan

د ئێریشه‌كه‌ ئاسیمانی یا تركیێ ده‌ كو ئیرۆ سه‌رێ سبێ ل ده‌ردوورا ئیدلبێ هات كرن، 9 چه‌كدارێن حزبوللا هاتنه‌ كوشتن و 30 بریندار كه‌تن، سه‌رۆك كۆمارێ تركیێ ژی راگهاند، ره‌ژیما سووریێ ژ ئێریشێن وان رزگار نابه‌.

ل گۆر ئاژانسا رۆیته‌رزێ، ئیرۆ سه‌رێ سبه‌هێ 29/2/2020ان باله‌فرێن جه‌نگ یێن ئارته‌شا تركیێ و هه‌روه‌ها تۆپهاڤێژێن ئارته‌شا تركیێ، ئێریشا خالێن چه‌كدارێن حزبوللا ل سووریێ ل ده‌ردوورا ئیدلبێ كر و زرارێن جانی یێن مه‌زن پێره‌ خستن.

ل گۆر ئامارێن فه‌رمی، د ئێریشێ ده‌، 9 چه‌كدارێن حزبوللا هاتنه‌ كوشتن و 30 بریندار كه‌تنه‌.

ئارته‌شا تركیێ راگهاند، د ئێریشێ ده‌ باره‌گه‌هه‌كا حزبوللا ل نێزی باژارۆكێ سه‌راقب هاتیه‌ هه‌ده‌ف كرن.

ئارته‌شا سووریێ ژ مه‌ها دیسامبه‌را سالا رابووری 2019ان ئێریشا سه‌ر كۆمێن چه‌كدارێن ئۆپۆزسیۆنێ ده‌ست پێ كرییه‌ و نها نێزی خالێن چاڤدێریێ یێن ئارته‌شا تركیێ ل دئیدلبێ بوونه‌.

ل دو رۆژێن رابووری د ئێریشه‌كا ئاسیمانی یا ره‌ژیما سووریێ ده‌، پێتر ژ 30 له‌شكرێن ترك هاتن كوشتن و پاش ڤێ یه‌كێ تركیێ د چه‌ندین ئێریشان ده‌ وه‌كه‌ تۆلهلدانه‌ك ب ده‌هان له‌شكرێن ره‌ژیما سووریێ كوشتنه‌.

ره‌جه‌ب ته‌یب ئه‌ردۆگان سه‌رۆك كۆمارێ تركیێ ژی ئیرۆ گۆت: «ئێدی هه‌ر تشتێ گرێدای ره‌ژیما سووریێ وێ ببه‌ ئارمانجا ئارته‌شا تركیێ و ته‌كه‌ز كر كو ل رۆژێن رابووری وان پێتر ژ 1000 له‌شكرێن ره‌ژیمێ به‌شار ئه‌سه‌دی كوشتنه‌».