یه‌كه‌م حاله‌تا تووشبوونێ ب ڤایرۆسا كۆرۆنایێ كۆڤید 19 ئیرۆ ل ولاتێ قه‌ته‌رێ هات تۆمار كرن كو گه‌شتیاره‌ك بوو ژ ئیرانێ ڤه‌گه‌ری یه.
وه‌زاره‌تا ساخله‌مییا قه‌ته‌رێ ئیرۆ رۆژا شه‌مبیێ 29/2/2020ێ تۆمار كرنا یه‌كه‌م حاله‌تا تووشبوونی ب ڤایرۆسا كۆرۆنایێ راگهاند كو گه‌شتیاره‌كه و ژ كۆمارا ئیسلامییا ئیرانێ ڤه‌گه‌ریایه قه‌ته‌رێ.
ئاژانسا فه‌رمی یا قه‌ته‌رێ ژ زارێ وه‌زاره‌تا ساخله‌میێ ڤه‌گوهاستییه، یه‌ك ژ وان گه‌شتیارێن ل پێنجشه‌مبا رابووری ژ ئیرانێ ڤه‌گه‌ری تێستێن وی یێن ڤایرۆسا كۆرۆنایێ پۆزه‌تیڤ ده‌ركه‌تن و نها ل ژێر چاڤدێرییا ساخله‌میێ یه.
ده‌ست نیشان كر، حكوومه‌تا قه‌ته‌رێ رێكارێن پێدڤی ژ بۆ رێگرتنێ ل به‌لاڤبوونا ڤایرۆسێ گرتنه به‌ر و كه‌سێن نێزی وی گه‌شتیاری تووشبوویی ژی خستنه بن چاڤدێریێ.
ل گۆر ئامارێ فه‌رمی، هه‌یا نها 85681 كه‌س ل سه‌رانسه‌ری جیهانێ تووشی كۆرۆنایێ بوونه، 2933 كه‌سان جانێ خوه ژ ده‌ستدایه و 39746 ژی چاره‌سه‌ر بووینه، ژبلی ولاتێ چینێ، كۆرۆنا ل 61 ولاتێن جیهانێ به‌لاڤه‌بوویه.
