پشتی کو رەژێما ئەسەد سینۆرێ ئاسیمانی یێ باکورێ سووریێ ب تایبەتی ئاسیمانێ باژارێ ئیدلبی ل باکورێ رۆژئاڤایی ڤی ولاتی گرتی، سەرۆکێ سەنتەرێ ئاشتییا رووسیا ل سووریێ، راگهاند ولاتێ وی ئێدی ئەولەهیا بالەفرێن ترکیێ ل سووریێ گارانتی ناكه‌ت.
فەرماندارێ دەریایی ئۆلیگ جۆراولیوف، سەرۆکێ سەنتەرێ ئاشتی یا رووسیێ ل سووریێ، رۆژا یەکشەمی د کۆنفەرەنسەکێ مەدیایی دا راگهاند کو ب بەرچاڤ گرتنا رەوشا نها، فەرماندارییا سەربازی یا رووسیێ ئێدی نه‌شێت ئەولەهیا بالەفرێن جەنگی یێن ترکیێ ل ئاسیمانێ سووریێ گارانتی بكه‌ت.
ئەڤ هەلوه‌ستا رووسیێ پشتی وێ یەکێ دهێت کو ئارتەشا رەژیما سووریێ ل گۆر راپۆرا پێگەها فەرمی یا سووریێ «سانا» سینۆرێ ئاسیمانی ل باکورێ رۆژئاڤایێ ڤی ولاتی ب تایبەتی ل باژارێ ئیدلبێ ل سەر بالەفرێن جەنگی گرتیە.
ل گۆر داخویانییا هاتییە بەلاڤ کرن: «رەژیما سووریێ دێ سەرەدەرییا دوژمنی دگەل هەر بالەفرەکێ ئەنجام بدەت کو سینۆرێ ئاسیمانی یێ ڤی ولاتی ل باکورێ رۆژئاڤا ب تایبەتی ل ئیدلبێ دەرباز بکه‌ت و دێ وان بالەفران ئارمانج کەت».
ئەڤ یەک د دەمەکێ دایە کو شەرێ بالەفرێن بێ پیلۆت د ناڤبەرا هێزێن سەر ب رەژیما بەشار ئەسەد و ئارتەشا ترکیێ و گرۆپێن چەکدار یێن سەر ب ترکیێ ده‌ست پێ كرییه.
ئالۆزیێن ئیدلبێ پشتی وێ یەکێ زێدە بوون کو 26 کەس ژ هێزێن رەژیما سووریی ل سینۆرێ باژارێن ئیدلب و حەلەبێ د ئێریشا ئاسیمانی یا بالەفرێن بێ پیلۆت یێن ترکیێ دا هاتنه کوشتن، پشتی ڤان ئێریشێن ترکیێ، رەژیما سووریێ كارڤه‌دان نیشان دا و بالەفرەکا بێ پیلۆت یا ترکیێ ل باژارێ سه‌راقب یێ سەر ب ئیدلبێ ڤە خستییە خوارێ.
نه‌رینگه‌ها سووریێ بۆ مافێن مرۆڤان یا سووریێ راگهاند کو د پەڤچوونێن د ناڤبەرا سووریێ و ترکیێ دا دو بالەفرێن جەنگ یێن رەژیما سووریێ ل باژارێ ئیدلبێ ژ ئالیێ ترکیێ ڤە هاتینە هه‌ده‌ف كرن و ئێخستن.
