جه‌نگا توركیا ل دژی سوپایێ سووریێ ل ده‌ردوورا ئدلبێ به‌رده‌وامه، د ده‌ما 24 ده‌مژمێرێن بووری دا، 327 سه‌ربازێن رژێما سووریێ هاتنه كوشتن.
وه‌زاره‌تا به‌رگرییا توركیا ئه‌ڤرۆ رۆژا سێشه‌مبێ 3/3/2020ێ راگه‌هاند، د ده‌ما 24 ده‌مژمێرێن بووری دا، سوپایێ توركیا 327 سه‌ربازێن سووریێ ل ده‌ردوورا ئدلبێ كوشتینه، هه‌روه‌ها زیانێن مه‌زن گه‌هاندینه سوپای.
ده‌ست نیشان كر، هه‌ر ژ دوهی رۆژا دوشه‌مبێ، «فرۆكه‌یه‌ك، فرۆكه‌یه‌كا بێ فرۆكه‌ڤان، 6 تانك، 5 تۆپهاڤێژ، 2 سیسته‌مێن به‌رگرییا ئاسمانی، 3 زریپۆش، 5 ترومبێلێ و هه‌روه‌ها ترومبێله‌كا سه‌ربازی و كۆگه‌هه‌كا چه‌كی» هاتنه ژناڤبرن.
وه‌زاره‌تا به‌رگرییا توركیا هه‌روه‌ها پشت راست كر كو هێزێن وان یێن ئاسمانی، فرۆكه‌یه‌كا شه‌ره‌كه‌ر ژ جۆرێ L-39 ئێخستینه و وه‌زاره‌تا به‌رگرییا سووریێ ئێخستنا وێ فرۆكێ دوپات كرییه.
سوپایێ سووریێ ژ مه‌ها دیسامبه‌را سالا بووری 2019ێ هێرشا سه‌ر كۆمێن چه‌كدارێن ئۆپۆزسیۆنێ ده‌ست پێ كریه و نها نێزیكی خالێن چاڤدێریێ یێن ئارته‌شا تركیێ ل ئدلبێ بووینه.
ل رۆژێن بووری د هێرشه‌كا ئاسمانی یا ر‌ژیما سووریێ دا، پتر ژ 30 سه‌ربازێن تورك هاتنه كوشتن و پاش توركیا د چه‌ندین هێرشان دا وه‌ك تۆلهلدانه‌كێ ب ده‌هان سه‌ربازێن ر‌ژیما سووریێ كوشتن.
ره‌جه‌ب ته‌یب ئه‌ردۆگان سه‌رۆك كۆمارێ توركیا گۆتییه: «ئێدی هه‌ر تشتێ گرێدای رژێما سووریێ دێ بیته ئارمانجا سوپایێ توركیا.
