ب ڤیدیۆ.. كۆرۆنایێ جهێن شووشتنا مریان ل ئیرانێ پری ته‌رم كرینه
ڤایرۆسا كۆرۆنایێ ل ته‌ڤاهییا ئیرانێ به‌لاڤه‌بوویه و نێزیكه ره‌وش ژ كۆنترۆلێ ده‌ربكه‌ڤیت، ب ئاوایه‌كی كو ئێدێ جهـ ژ بۆ ته‌رمێن قوربانییان نه‌ماینه.
چاڤكانیێن پێگه‌ها داركا مازی ل ئیران و رۆژهلاتا كوردستانێ ئاشكرا كرینه، هه‌ژمارا تووشبوویێن ڤایرۆسا كۆرۆنا یا نوو كۆڤید-19 گه‌له‌ك ژ وێ هه‌ژمارێ پێترن كو حكوومه‌تا وی وه‌لاتێ رادگه‌هینیت، ب ئاوایه‌كی كو ره‌وش ژ كۆنترۆلێ ده‌ركه‌تییه و زه‌نگا خه‌ته‌رێ ژ مێژه لێدایه.
ل گۆر ڤیدیۆیه‌كێ كو ل جهێ «به‌هه‌شتێ مه‌عسوومێ» یێ شووشتنا مریان ل ته‌هرانا پایته‌ختا ئیرانێ هاتییه گرتن، خویا دبیت كانێ چه‌وا ب ده‌هان ته‌رم ل وێرێ نه و هه‌ر هه‌موو یێن قوربانیێن ڤایرۆسا كۆرۆنایێ نه.
ئه‌ڤ ڤیدیۆ ژ ئالیێ یه‌ك ژ كارمه‌ندێن ساخله‌میێ ڤه هاتییه گرتن و تێدا دبێژیت: «هه‌ژمارا قوربانییان گه‌له‌كه‌ن، ئێدی جهـ ژ بۆ ته‌رمان نه‌مایه، ب هه‌زاران كه‌سان جانێ خوه ده‌ست داینه و ب هه‌زاران كه‌س تووش بوونه».
ئه‌ڤ ڤیدیۆ دوهی رۆژا دوشه‌مبێ 2/3/2020ێ هاتییه گرتن و ئه‌و كارمه‌ندێ ساخله‌میێ تێدا دبێژیت: «ئه‌ڤه ئه‌و ته‌رمن كو هاتینه شووشتن، هه‌ژمارا وان گه‌له‌كن و ئه‌م ڤێرا ناگه‌هین».
