سەرۆک کۆمارێ ئیرانێ، حەسەن رۆحانی راگهاند: “ئەز سۆز ددم ب ئالیکاریا تیمێن تەندرۆستیێ یێن پسپۆر و ئیرادە و هەماهەنگیا گەل د کێمترین دەم دە و ب کێمترین زیان ب سەر ڤێ پرسگرێکێ زال ببین”.
پشتی زێدەبوونا تووشبوویێن ڤیرۆسا کۆرۆنایێ ل ئیرانێ، سەرۆک کۆمارێ ئیرانێ، حەسەن رۆحانی راگهاند: «ڤیرۆسا کۆرۆنایا نوو (کۆڤید-19) نێزی هەموو پارێزگەهێن ئیرانێ ب خوە ڤە گرتینە».
سەرۆکاتیا کۆمارا ئیرانێ راگهاند کو، د جڤینا ئەنجوومەنا وەزیران دە رۆحانی دەربارێ بەلاڤ بوونا زێدەتر یا ڤیرۆسا کۆرۆنا گۆتیە: «ڤیرۆسا کۆرۆنایا نوو (کۆڤید-19) نێزی هەموو پارێزگەهێن ئیرانێ ب خوە ڤە گرتیە. ئەڤ نەخوەشیەکە ڤیرۆسی یە کو پرانیا ولاتان ب خوە ڤە گرتیە. ب وەرگرتنا رێکارێن پێویست و هەماهەنگیێ، د دەمەکا کێم دە پێویستە ئەڤ نەخوەشی بهێت کۆنتورۆل کر».
هەڤدەم دگەل داخوەیانیا سەرۆک کۆمارێ ئیرانێ، وەزارەتا تەندروستی یا ئیرانێ راگهاند، ژمارا کەسێن تووشبوویی ب ڤیرۆسا کۆرۆنا ل ئیرانێ زێدە بوویە و هەژمارا کەسێن ب ڤی ڤیرۆسی جانێ خوە ژ دەست دای بلند بوویە و گهانە 92 کەسان هەر وەها ژمارا کەسێن تووش بوویی ژی ژ بۆ 2 هەزار و 922 کەسان بلند بوو.
رێڤەبەرێ پەیوەندیان ل وەزارەتا تەندروستی یا ئیرانێ، کیانوش جەهانپور د کۆنگرەیەکە رۆژنامەڤانی دە ئاماژە ب ڤێ یەکێ دا کو 15 کەسێن دن ب سەدەما ڤیرۆسا کۆرۆنایێ جانێ خوە ژ دەست دا.
ب ڤێ یەکێ ژی هژمارا کەسێن ب سەدەما ڤێ ڤیرۆسێ جانێ خوە ژ دەست دای ل ئیرانێ ژ بۆ 92 کەسان بلند بوو.
کیانوش جەهانپور هەر وەها راگهاند کو 586 حالەتێن دن یێن تووشبوویێن ڤیرۆسا کۆرۆنا ل ئیرانێ هاتینە تۆمارکرن و ب ڤێ یەکێ هژمارا تووشبوویان گهیشت 2 هەزار و 922 کەسان.
