«هه‌تا نه‌ورۆزێ دێ چ رووده‌ت؟»

فه‌رماندارێ گشتیێ سپایێ پاسدارێن ئیرانێ ئه‌ڤرۆ راگهاند، ئه‌و ب دوور نابینن كو ڤایرۆسا كۆرۆنایێ هێرشه‌كا بایۆلۆجی یا ئه‌مه‌ریكایێ بیت.

حسێن سه‌لامی فه‌رماندارێ گشتیێ سپایێ پاسدارێن ئیرانێ ئه‌ڤرۆ رۆژا پێنجشه‌مبێ 5/3/2020ێ ل ده‌ربارا ڤایرۆسا كۆرۆنا یا نوو (كۆڤید-19) داخویانی دا و گۆت: «د به‌رهه‌نگاربوونا ڤێ ڤایرۆسێ دا دێ ب سه‌ركه‌ڤین كو ل ده‌ستپێكێ ل چینێ و پاش ل ئیرانێ و جهێن دی یێن جیهانێ به‌لاڤه‌بوویه»‌.

هه‌روه‌ها ده‌ست نیشان كر كو نه‌دووره‌ ئه‌ڤ ڤایرۆسه‌، هێرشه‌كا بایۆلۆجی یا ئه‌مه‌ریكایێ بیت، ئه‌گه‌ر ئه‌مه‌ریكایێ ئه‌ڤ كاره‌ كربیت، ل ڤێره‌ پێدڤییه‌ ئه‌و بزانیت كو خرابییا وێ ژ بۆ گه‌لێ وێ ژی ڤه‌گه‌ریایه‌، ئه‌گه‌ر كارێ ئه‌مه‌ریكایێ ژی نه‌بیت، ئه‌ڤ ڤایرۆسه‌ دێ ژناڤچیت.

حسێن سه‌لامی ئه‌ڤ داخویانی ئه‌ڤرۆ د چالاكییه‌كێ دا ل پارێزگه‌ها كرمان دایه‌ و هه‌روه‌ها تێدا گۆتییه‌: «پێدڤییه‌ ئه‌م هه‌موو ڤێ چه‌ندێ بزانین، سه‌قامگیری و پێداگیریێ هه‌تا داوییا ئه‌ڤساله‌ ئانكو ل گۆر سالا ئیرانێ 21ێ ئادارێ ئه‌ڤ ره‌وشه‌ دێ ده‌رباز بیت».

ل گۆر داتایێن فه‌رمی یێن ئیرانێ، هه‌تا نها پێتر ژ 3500 كه‌سان ل ئیرانێ تووشی كۆرۆنایێ بووینه‌، 107 كه‌س ژی مرینه‌، لێ به‌لێ ژێده‌رێن نه‌فه‌رمی ئاماژه‌ دكه‌ن كو هه‌ژمار گه‌له‌ك ژ ڤێ پتره‌.