ده‌رده‌كێ سه‌یر ل ئەسیۆپیا سه‌رهلدایه‌

د دەمەکی دا کو هەموو جیهان ب ڤایرۆسا کۆرۆنایێ ڤە مژوولە، لێ وەلاتێ ئەسیۆپیا مژوولی ڤایرۆسەکێ کوژەکترە کو هه‌تا نها جانێ پتر ژ 2 هەزار کەسان ژێ ستاندیە، تووشبوویێن ڤی ڤایرۆسی کو هێشتا چ ناڤەک ژ بۆ نەهاتیە دانان، خوین ژ چاڤ، دفن و دەڤێ وان دهێت و جانێ خوە ژ دەست د ده‌ن.

ل گۆری راپۆرته‌كا پێگەها « «Dailymedicalinfoمرۆڤێن ئه‌فریقیا و وه‌لاتێ ئەسیۆپیا و پاش گیان ژدەستدانا چەندین هزار وه‌لاتیێن ڤی وەلاتی ب ئه‌گه‌را نەخوەشیەکا نە ناس کری، د ترس و دلگرانییەکا مەزن دا دژین، مرۆڤێن كو تووشی ڤی ڤایرۆسێ نوو دبن، سپیاتییا چاڤێن وان زه‌ر دبیت و هه‌روه‌ها نیڤا ده‌ستێن وان ژی.

هه‌روه‌ها پشتی دەمەکی خوین ژ چاڤ و دفنێ دهێت، دیسان ئه‌ڤ مرۆڤه‌ نه‌شێن بنڤن و خوارنێ بخوون و پاش گیانێ خوه‌ ژ ده‌ست دده‌ن.

ئەڤ نیشانە بۆ ئێكه‌م جار ل ده‌ڤ كه‌سه‌كی ده‌ركه‌تن كو ل گونده‌كی دژیت و پرۆژه‌یه‌كێ غازێ ل نێزیكی وی گوندی هه‌یه‌، ئەڤ پرۆژە د دەست كۆمپانییه‌كا چینی دا یە، لێ د دەما رۆژێن بووری دا هەژمارەکا زێدە ژ وان کەسێن ل نێزیكی ڤی پرۆژه‌ی دژین تووشی وان نیشانان دبن و گیانێ خوه‌ ژ ده‌ست دده‌ن.

ئەڤ كۆمپانییه‌ تایبەتمەند ب کۆلان و لێگەریانێ ل غازێ و په‌ترۆلێ و وەکە ژێده‌را بەلاڤبوونا ڤێ نەخوەشیێ هاتییه‌ زانین، ب تایبەتی کو پاشماییێن مادده‌یێن کێمیایی یێن ڤێ كۆمپانیێ ئاڤا ڤەخوارنێ یا وێ ده‌ڤه‌رێ ژەهراوی کرییە و ئەڤ ژەهراوی کرنە نه‌دووره‌ د وه‌رزێ بارانان دا پێتر لێ بهێت.

ل گۆری ئاماران ژ دەما دەست ب کار بوونا ڤی پرۆژەی ل سالا 2014ێ هه‌تا نها پتری 2000 کەسان ل ڤێ ده‌ڤه‌رێ ب هه‌مان نیشانێن نه‌خۆشیێ گیانێ خوه‌ ژ ده‌ست دا یه‌.

رۆژنامەیا گاردیان ژی دبێژیت: «هەژمارەکە هەره‌ زێدە ژ سکالایێن خەلکێ گه‌هشتینه‌ دەست وان کو ژ مرنا زێدە یا ب ئه‌گه‌را پرۆژەیێ گازندان دكه‌ن».

ئەڤێ رۆژنامە نڤیسییه‌: «كۆمپانییا چینی هنده‌ك ماددەیێن کێمیایی بکار دئینیت كو كاریگه‌رییه‌كا زێده‌ خراب ل سەر سلامەتییا ئاكنجیێن ڤێ ده‌ڤه‌رێ دکەت».

ئەڤ نەخوەشییە بەشەکە ژ وان نەخوەشیێن نەهێنه‌ ناس کرن کو ل ڤێ دوماهیێ ل ڤێ ده‌ڤه‌رێ هاتینە دیتن و به‌ری نها ئەڤ نەخوەشییە ل وەلاتێ ئەسیۆپیا نەهاتینە دیتن.