هه‌ڤالبه‌ندێ په‌یه‌دێ دبێژیت: «دۆزا كوردی دره‌وه‌»

هەڤالبەندێ پارتیا یەکیتیا دەمۆکراتیک «پەیەدێ»، بەشار ئەسەد د هەڤدیتنەکا تایبەت دا دگەل کەنالێ (رۆسیا الیوم) دبێژیت: «چ دۆزه‌ك ب ناڤێ دۆزا كوردی ل سووریێ نینه‌، به‌لكو د ئه‌ساس دا ئه‌ڤ ناڤكرنه‌ وه‌هم و دره‌وه‌».

به‌شار ئه‌سه‌د سه‌رۆكێ سووریێ ئه‌ڤرۆ رۆژا پێنجشه‌مبێ 5/3/2020ێ د هه‌ڤدیتنه‌كێ دا ل گه‌ل كه‌نالێ (رۆسیا الیوم) ل ده‌ربارا چه‌ندێن مژاران ئاخفت، وه‌ك ئالۆزیێن سووریێ، شه‌رێ ئدلبێ و هێرشا تركیێ، هه‌روه‌ها دۆزا كوردی.

ئه‌سه‌د گۆت: «چ دوزه‌ك ب ناڤێ دۆزا كوردی ل سووریێ نینه‌، به‌لكو ئه‌ڤ یه‌ك وه‌هم و دره‌وه‌ و ژ به‌ر هنده‌ك ئه‌گه‌رێن دیرۆكی، مه‌ نها په‌یوه‌ندی دگه‌ل گرۆپێن سیاسی یێن كوردی ل باكورێ سووریێ هه‌یه‌، لێ كێشه‌ ئه‌وه‌ كو ئه‌ڤ گرۆپه‌ ل بن ده‌ستهلاتا ئه‌مه‌ریكایێ كار دكه‌ن، ئه‌م نابێژین هه‌موو كوردێن سووریێ، ژ به‌ر كو پرانییا كوردێن سووریێ و عه‌شیره‌تێن وان دگه‌ل ده‌وله‌تێ نه‌، لێ ئه‌ڤ گرۆپێن بچووك دگه‌ل ئه‌مه‌ریكییان كار دكه‌ن».

سه‌باره‌ت پرسا دۆزا كوردی ژی، به‌شار ئه‌سه‌د دبێژیت: «چ تشته‌ك ب ناڤێ دۆزا كوردی ل سووریێ نینه‌ و ژ به‌ر ئه‌گه‌ره‌كا گه‌له‌ك ب ساناهی، ئه‌و ئه‌گه‌ر ژی ئه‌ڤه‌یه‌، كورد ژ كه‌ڤن وه‌ره‌ ل سووریێ دژین، لێ هنده‌ك گرۆپ ل باكورێ سووریێ كو د سه‌ده‌یا رابووری دا ژ به‌ر سته‌ما تركیێ ره‌ڤین و ل وی ده‌می مه‌ پێشوازی لێكر، حه‌زێن جوداخوازیێ هه‌بوون».

سه‌رۆكێ سووریێ دبێژیت: «ژ به‌ر ڤێ ئه‌گه‌رێ چ دۆزه‌ك ب ناڤێ دۆزا كوردی ل سووریێ نینه‌، به‌لكو ل سووریێ پێكهاتهو فره‌ئالی هه‌یه»‌.

ئەڤ داخوەیانیا بەشار ئەسەد سه‌رۆکێ رژێما سووریێ و هەڤالبەندێ پارتیا یەکیتییا دەمۆکراتیک «پەیەدێ»، باشترین بەلگەیە کو پەیەدە ژ بۆ رژێما سووریێ شەرێ ب وەکالەت ل رۆژئاڤایێ کوردستانێ ئەنجام دا یە و هه‌تا نها ژی ڤی کاری ئەنجام دده‌ت.

وەکە دیار پارتییا یەکیتییا دەمۆکراتیک «پەیەدێ»، کو پارتییەکا سەر ب پەکەکێ ڤه‌ یە و ل گۆر ئایدۆلۆژییا پەکەکێ و ئۆجالان خه‌باتێ دكه‌ت، ژ سالا 2012ێ هەیا نها ناڤچەیێن کوردستانا رۆژئاڤا ئێخستینە بن دەستێ خۆ و ژ بۆ رژێما سووریێ ڤان ناڤچەیان دپارێزیت و د ڤێ رێكێ دا خوینا پتر ژ 11 هەزار جوان و گه‌نجێن کورد کرییە قوربانی.

دهێته‌ زانین ئەڤ جارا ئێكێ نینە کو بەشار ئەسەد داخویانیێن ب ڤی ئاوایی ل سەر دۆزا کوردان ل رۆژئاڤایێ کوردستانێ ددەت، ئەسەد د داوی هەڤدیتنا خۆ یا مەدیایی دا ل سالا 2019ێ جارەکا دی ب ڤی ئاوایی ئاخفتن کربوون، و د بەرسڤا ئەسەدی دا پارتییا یەکێتییا دەمۆکراتیک «پەیەدێ» ب تنێ گۆتبوو :«ئەڤ داخویانیێن ئەسەدی یەکرێزیا گەلێ سووریێ ل همبەر ترکێن داگیرکار تێک ددەت».