جێگرێ وەزیرێ پیشەسازی، کانزا و بازرگانی ل ئیرانێ رۆژا پێنجشەمی 12/3/2020ان راگهاند کو بەرهەم ئانینا مەیێ ل ئیرانێ هەیا ئاگەهدارکرنەک دن پێویست ب ت دەستیریان ژ وەزارەتێ ناکە و هەرکەس دکارە مەیێ ل گۆر شیانێن خوە بەرهەم بینە.

ل گۆرەی راپۆرا «پێگەها ئیلنا» حسێن مدەرس خیابانی، جێگرێ وەزیرێ پیشەسازی، کانزا و بازرگانی ب دەرکرنا هایدارکرنەکێ  ژ بۆ سازیێن پیشەسازی، کانزا و بازرگانی یێن باژارێن ئیرانێ راگهاندیە: «بەرهەمئانینا مەیێ د ناڤا وەلات دە هەیا هایدارکرنا داویێ پێویست ب وەرگرتنا ت دەستیریان ژ سازیێن گرێدایی ڤی بابەتی نینە».

ناڤبری تەکەز کر کو: «ل گۆرەی راگهاندنا لیژنەیا بلند ئا بەرهنگاربوونا کۆرۆنایێ ل وەزارەتا پێشەسازی، کانزا و بازرگانی و ب بەرچاڤ وەرگرتنا راگهاندنا ئامادەبوونا هنەک سازیێن بەرهەمئانینێ ژ بۆ بەرهەمئانینا مەیا پێویست د وەلاتی دە، بەرهەمئانینا مەیێ پێویستی ب ت دەستیریان ناکە. ئەشکەرە یە کو مەیە ل ڤان سازیا تێ بەرهەمئانین وێ ل ژێر چاڤدێریا زانینگەهێن زانستێن پزیشکی یێن باژاران و سازیێن گرێدایی خوارن ودەرمانان بە، هەروەها وێ ماددەیێن پێویست ژ بۆ تافیلکرنا سازیێن بەرهەمئانینا مەیێ لسەر وان بێ پارڤەکرن».

حسێن مدەرس هەروەها راگهاند: «ب وان هەماهەنگیێن هاتی ئەنجامدان د گەل گۆمرکێن کۆمارا ئیسلامی یا ئیرانێ، رێ ب ئانینا بارێن ماسک، مەی و تشتێن دن ئێن پێویست ژ بۆ مەرەما بەرهنگاربوونا بەلاڤ بوونا ڤایرۆسا کۆرۆنا د کێمترین دەم دە (هەری کێم د دەما 48 دەمژمێران دە)وێ رێ پێ وەرە دان».

 ل گۆرەی راپۆرێن مەدیایی  پشتی بەلاڤ بوونا ڤایرۆسا کۆرۆنا ل ئیرانێ د 6 باژارێن ئیرانێ دە هەیا نها پێتری 60 کەسان، کو ب گۆتنا بەرپرێة ئیرانێ مەی ژ بۆ بەرهنگاربوونا ڤایرۆسا کۆرۆنا ڤەخاربوو، جانێ خوە ژ دەست دایە.

هێژایی گۆتنێ یە کو سازیا جیهانی یا ساخلەمیێ، ل 2/10/2019ان راگهاندبوو کو ئیران ل پلەیا 9ێ تێ ل سەر ئاستا وان ولاتێن پێترترین رێژەیا مەیێ ڤەدخوەن ل سەر ئاستا 189 ولاتێن جیهانێ.