ئیران نه‌خۆشێن كۆرۆنایێ ڤه‌دگوهێزیت ئیراقێ
ب فه‌رمانا هادی عامری نه‌خۆشێن كۆرۆنایێ ب باله‌فرێن سه‌ربازی ژ ئیرانێ بۆ ئیراقێ تێن ڤه‌گوهاستن
هه‌ژماره‌كه نه‌خۆشێن كۆرۆنایێ ژ 11 ڤێ مه‌هێ ڤه ژ كۆمارا ئیسلامییا ئیرانێ ب رێكێن ئاسمانی و په‌ژاهی ژ بۆ ئیراقێ تێن ده‌رباز كر، دیمه‌نێن ده‌رباز كرنا وان ژی هاتنه گرتن و خه‌لك ژ حكوومه‌تا فه‌ده‌رال دخوازیت روهنكرنه‌كێ بده‌ت.
پاش به‌لاڤبوونا ڤایرۆسا كۆرۆنا یا نوو (كۆڤید-19) ل ئیرانێ و دانپێدانا ده‌ستهلاتا وێ ب كه‌تنا سازیێن ساخله‌میێ و ده‌ركه‌تنا ڤایرۆسێ ژ بن كۆنترۆلا وان، ئێدی نه‌خۆشێن ڤایرۆسێ ژ بۆ ئیراقێ تێن ڤه‌گوهازتن، به‌رپرسیارێن مه‌زن یێن حه‌شدا شه‌عبی رێكێ ژ بۆ وێ ڤه‌گوهاستنێ خۆش دكن.
ل گۆر هنه‌ك ڤیدیۆیان كو پاش 11/3/2020ێ هاتنه به‌لاڤ كرن، د سینۆرێ پارێزگه‌هییا به‌سرایێ را، پێتر ژ 15 ئه‌مبولانسان ژ ئیرانێ ده‌رباس ئیراقێ بووینه و ل گۆر چاڤكانیێن وێ پارێزگه‌هیێ و چالاكڤانان، نه‌خۆشێن كۆرنایێ یێن ئیراقی و هه‌روه‌ها یێن ئیرانی د وان ئه‌مبولانسان دا نه و ژ بۆ وه‌رگرتنا چاره‌سه‌ریێ ئه‌و ژ ئیرانێ بۆ ئیراقێ تێن ڤه‌گوهاستن.
هه‌روه‌ها د ڤیدیۆیه‌كا دی دا، باله‌فره‌كا سه‌ربازی یا ئیراقێ ب فه‌رمانا هادی عامری ئه‌میندارێ رێخستنا به‌در بالێ هه‌ری دیار یێ میلیشیایا حه‌شدا شه‌عبی، ب ده‌هان نه‌خۆشێن ئیرانی و ئیراقی یێن ڤایرۆسا كۆرۆنایێ ژ بۆ ئیراقێ هاتنه ڤه‌گوهاستن.
ل گۆر داوی ئامار هه‌یا نها ڤایرۆسا كۆرۆنایێ ل ته‌ڤاهییا باژارێن ئیرانێ و رۆژهلاتا كوردستانێ به‌لاڤه‌بوویه، هه‌تا ئیرۆ رۆژا چارشه‌مبێ 17 هه‌زار و 361 تووشی ڤایرۆسا كۆرۆنایێ بوونه، 1123 كه‌سان ژی جانێ خوه ژ ده‌ست دایه، لێ به‌لێ رێخستنا ساخله‌مییا جیهانی راگهاندییه، ئامارێن ئیرانێ گه‌له‌ك ژ وێ هه‌ژمارێ پێترن كو ده‌ستهلاتا وێ رادگه‌هینیت.
چاڤكانیێن رۆژنامه‌ڤانی یێن ئیرانێ ژی ته‌سبیت كرینه كو نه‌خۆشخانه‌یێن ئیرانێ پر بووینه و ئێدی كارینا وه‌رگرتنا نه‌خۆشێن زێده‌تر نینه، قوربانیێن كۆرۆنایێ ژی د گۆرێن ب كۆم دا ل قومێ و هه‌ژماره‌كا باژارێن دن تێن ڤه‌شارتن، له‌وما ئیران نها هه‌ولا ڤه‌گوهاستنا نه‌خۆشان ژ بۆ وه‌رگرتنا چاره‌سه‌ریێ ژ بۆ ئیراقێ دكه‌ت.
