وه‌زیرێ ناڤخوه ژ دهۆكێ: «دێ قه‌یرانێ ده‌رباز كه‌ین و زیانڤێكه‌فتی دێ هێنه قه‌ره‌بووكرن»
رێبه‌ر ئه‌حمه‌د: ب فه‌رمانا مه‌سروور بارزانی لژنه‌یه‌ك ژ بۆ كه‌یسا كۆرۆنایێ یا دهۆكێ هاتییه پێكئینان و هه‌ر كه‌سێ خه‌مساری كربیت دێ هێته سزادان و ئه‌نجامێن لێكۆلینێ دێ ژ بۆ خه‌لكێ به‌هدینان ئه‌شكه‌ره كه‌ین
وه‌زیرێ ناڤخۆ یێ هه‌رێما كوردستانێ ئه‌ڤرۆ سه‌ره‌دانا پارێزگه‌ها دهۆكێ كر و ل گه‌ل ئیداره‌یا پارێزگه‌هێ كۆمبوو، قه‌ره‌بووكرنا زیانڤێكه‌فتیێن له‌هیان و رێكارێن به‌رهنگاربوونا ڤایرۆسا كۆرۆنایێ گۆتوبێژ كرن.
ل سه‌ر فه‌رمانا مه‌سروور بارزرانی، سه‌رۆك وه‌زیرێ هه‌رێما باشوورێ كوردستانێ، رێبه‌ر ئه‌حمه‌د وه‌زیرێ ناڤخۆ یێ حكوومه‌تا هه‌رێما باشوورێ كوردستانێ ئه‌ڤرۆ رۆژا ئه‌ینیێ 20/3/2020ێ پێش سه‌رۆك وه‌زیران ڤه سه‌ره‌دانا باژارێ دهۆكێ كر ژ بۆ كو ل سه‌ر رێكارێن به‌رهنگاربوونا ڤایرۆسا كۆرۆنایێ و هه‌روه‌ها پرسا قه‌ره‌بوونا زیانڤێكه‌فتیێن له‌هیێن رۆژێن رابووری راوه‌ستیت.
رێبه‌ر ئه‌حمه‌د ل گه‌ل پارێزگه‌رێ دهۆكێ و به‌رپرسیارێن ئێمناهیێ یێن پارێزگه‌هێ كۆمبوو، رێكارێن حكوومه‌تێ ژ بۆ به‌رهنگاربوونا ڤایرۆسا كۆرۆنایێ و پرسا قه‌ره‌بووكرنا زیانڤێكه‌فتیێن له‌هی و بارانان گۆتوبێژ كرن.
مه‌سروور بارزانی سه‌رۆك وه‌زیرێ هه‌رێما باشوورێ كوردستانێ دوهی رۆژا پێنجشه‌می كوژمێ 2 ملیار دیناران ژ بۆ قه‌ره‌بووكرنا زیانڤێكه‌فتیێن له‌هی و بارانان ته‌رخان كرن، رێبه‌ر ئه‌حمه‌د وه‌زیرێ ناڤخۆ ژی ئه‌ڤرۆ ژ بۆ نێزیك هایداربوونێ ل سه‌ر ره‌وشا ناڤچه‌یێن زیان ڤێ كه‌فتی سه‌ره‌دانا وان تاخ و ناڤچه‌یێن دهۆكێ و زاخۆ كر.
رێبه‌ر ئه‌حمه‌د د كۆنگره‌یه‌كێ رۆژنامه‌ڤانی دا به‌حسا داوی پێشهاتیێن ڤایرۆسا كۆرۆنایێ و رێكارێن حكوومه‌تێ یێن به‌رهنگاربوونێ كر، هه‌روه‌ها سپاسییا گه‌لێ كوردستانێ ژ بۆ هه‌ڤكارییا وان كر.
رێبه‌ر ئه‌حمه‌د گۆت: ڤایرۆسا كۆرۆنایێ كاریگه‌رییه‌كا راسته راست ل سه‌ر ئابووریا جیهانێ، ئیراقێ و كوردستانێ هه‌یه، هه‌موه‌خت هه‌ڤركیێن ناڤده‌وله‌تی و هه‌رێمێ كاریگه‌ری ل نرخا په‌ترۆلێ كرییه، ئه‌ڤ ژی ب زیانه‌كه مه‌زن ب ناڤ كر.
هه‌روه‌ها ده‌ست نیشان كر، داهاتیێ ده‌روازه‌یێن سینۆری یێن هه‌رێما كوردستانێ ب رێژه‌یا 10 هه‌تا 20% داكه‌تییه و گۆت: هه‌ر چه‌ند كو ره‌وشا ئابووری یا به‌ر ب خرابیێ دچیت، لێ به‌لێ حكوومه‌تێ شانه‌یه‌كا قه‌یرانان چێكرییه ژ بۆ كو ب ئاوایه‌كی گونجای و كێمترین زیان سه‌ره‌ده‌ری ل گه‌ل ره‌وشێ بهێت كرن.
ل ده‌ربارا وێ كه‌یسا كۆرۆنایێ ژی كو ل پارێزگه‌ها دهۆكێ ئه‌شكه‌ره بوویه، وه‌زیرێ ناڤخۆ گۆت: ل سه‌ر فه‌رمانا سه‌رۆكێ وه‌زیران هه‌ر كه‌سێ سه‌رپێچییا رێنمایان بكه‌ت دێ هێته سزادان و ژ بۆ كه‌یسا دهۆكێ ژی مه‌سروور بارزانی فه‌رمان دایه سازییا ئاساییشا گشتی كو هه‌ر كه‌سێ كه‌متر خه‌می كربیت دێ هێته سزادان ژ به‌ر كو چ كه‌س د سه‌ر یاسایێ دا نینه و گۆت حكوومه‌ت دێ گه‌له‌ك یا راستگۆ بیت و دێ ده‌رئه‌نجامێن لێكۆلینێ به‌لاڤ كه‌ت و كه‌متر خه‌میێ ژ چ كه‌سێ قه‌بوول ناكه‌ت.
ل ده‌ربارا باران و له‌هیێن رۆژێن رابووری ژی وه‌زیرێ ناڤخۆ گۆت: حكوومه‌تا هه‌رێما كوردستانێ هه‌ر چه‌ند كو ره‌وشا وێ یا ئابووری گونجای نینه، لێ به‌لێ قه‌بارێ دو ملیار دیناران هاتینه ته‌رخان كرن و ئه‌و بودجه ژ ئالیێ حكوومه‌تێن خۆجهی هێته دابه‌ش كرن ل سه‌ر زیانڤێكه‌فتییان.
ب سه‌ده‌ما له‌هیێن رۆژێن رابووری پێتری 400 خانیێن باژارێن دهۆك، سێمێل و زاخۆ و هه‌ژماره‌كا ده‌ڤه‌رێن دی یێن سه‌ر ب پارێزگه‌ها دهۆكێ ڤه، زیان ڤێ كه‌فتبوون.
