رێخستنا ساخله‌مییا جیهانی ئه‌ڤرۆ راگه‌هاند، دروستكرنا ڤاكسینا ڤایرۆسا كۆرۆنا یا نوو (كۆڤید-19) ساله‌ك بۆ دڤێت.
رێخستنا ساخله‌مییا جیهانی ئه‌ڤرۆ رۆژا ئێكشه‌مبێ 22/3/2020ێ ل ده‌ربارا بزاڤێن دروستكرنا ڤاكسینه‌كێ ژ بۆ ڤایرۆسا كۆرۆنا یا نوو (كۆڤید-19) هنده‌ك زانیاری به‌لاڤكرن و تێدا هاتییه: «هه‌ر ڤاكسینه‌كا ژ بۆ ڤێ ڤایرۆسێ بهێت پێشدابرن، ب كێمی ساله‌ك بۆ دڤێت».
هه‌روه‌ها دیار كر، ڤاكسینا كۆرۆنا ڤایرۆسێ ب پشت راستی ڤه دێ هێته دروست كرن، لێ ده‌م بۆ دڤێت.
ساخله‌مییا جیهانی ئه‌و یه‌ك ده‌ست نیشان كر كو خه‌ته‌را ڤێ قۆناغێ ئه‌وه كو پاش ب داوی هاتنا قه‌ده‌غه‌یێن ده‌ركه‌تنێ و رێكارێن كه‌ره‌نتینكرنێ، ڤایرۆس جاره‌كا دی ب ئاوایه‌كی به‌رفره‌هـ به‌لاڤه ببیت، ژ به‌ر كو نه‌دیاره كانێ ل چ ده‌مه‌كی دێ ب داوی هێت.
ل گۆر زانیاریێن رێخستنا ساخله‌مییا جیهانی، نها 30 پرۆسه ژ بۆ چیكرنا ڤاكسینه‌كێ ژ بۆ ڤایرۆسێ كۆرۆنایێ ل سه‌رانسه‌ری جیهانی برێڤه‌دچن.
