ده‌وله‌مه‌ند چاوا خوه‌ ژ ڤێ ره‌وشێ دپارێزن؟

ل ده‌مه‌كی پرانییا خه‌لكی ل سه‌رانسه‌ری جیهانێ بزاڤێ دكه‌ن رێنمایێن ته‌ندروستییا جیهانی و حكوومه‌تێن وه‌لاتێن خوه‌ بجهـ بینن و خوه‌ د مالێن خوه‌ ڤه‌ ئاسێ كرینه‌، لێ به‌لێ ده‌وله‌مه‌ندان هنه‌ك رێكێ جودا هه‌نه‌ و د رۆژه‌كا وه‌ها دا ئه‌و ئاماده‌نه‌ ب ملیۆنێن دۆلاران ب مه‌زێخن ته‌نێ ژ بۆ كۆ بگه‌هن جهه‌كێ بێ ڤایرۆس.

ل گۆر راپۆرته‌كا «ده‌یلی ته‌لێگراف» یا به‌رتیانی، هه‌ر چه‌ند كو سنۆر ژ به‌ر به‌لاڤبوونا ڤایرۆسا كۆرۆنایێ د گرتینه‌، لێ به‌لێ هه‌ژماره‌كا ملیاردێران ده‌ست ب گه‌شتێن درێژ ژ بۆ جهێن بێ ڤایرۆس كرینه‌، ب رێیا یه‌ختێن گران بها و باله‌فرێن تایبه‌ت.

جۆناسان بیكێت سه‌رۆكێ جێبه‌جێكار یێ كۆمپانییا «برجێس» یا ب كرێدانا یه‌ختێن گران بها ل به‌ریتانیا دبێژیت: «یه‌خت جهه‌كێ گه‌له‌ك جوانه‌ ژ بۆ كو تو خوه‌ تێدا كه‌ره‌نتین بكه‌ی».

هه‌روه‌ها ده‌ست نیشان كر، ل رۆژێن رابووری وان چه‌ندین گه‌شت بۆ ملیاردێر و كه‌ساتیێن vip ژ بۆ جهێن دوور وه‌كه‌ ئالاسكا و گرئاڤێن باشوورێ ئۆقیانۆسێ ئارام رێكخستنه‌ و گۆت: «كرێیا یه‌خته‌كێ ل گه‌ل تیما وێ دگه‌هیته‌ نێزی ملیۆن دۆلاران بۆ یه‌ك حه‌فتی».

كۆمپانییا «ئیلێت جێتس» كو باره‌گه‌ها وێ ل له‌نده‌نێ یه‌ و تایبه‌ته‌ ب كرێدانا باله‌فرێن تایبه‌ت، دیار كر ل دو حه‌فتیێن رابووری وان 460 داخوازی ژ بۆ كرێكرنا باله‌فران ژ ئالیێ ده‌له‌مه‌ندان ڤه‌ وه‌رگرتنه‌.

كریستۆڤه‌ر ویلیام رێڤه‌به‌رێ كۆمپانیێ دبێژیت: «ترسه‌كا زێده‌ ل جه‌م خه‌لكی چێبوویه‌ و ملیاردێرێن ئه‌ورۆپایێ دبێژن به‌س مه‌ ده‌ربێخن و قورتال بكه‌ن، پاره‌ نه‌ گرنگه‌ چه‌ند بیت ئه‌مێ بده‌ین».