سه‌رۆكوه‌زیرێ فره‌نسایێ ئیرۆ راگه‌هاند، د نها دا نێڤا خه‌لكێ جیهانێ د مالێن خوه دا نه و ئه‌و پێشبینییا ره‌وشه‌كا خرابتر ژ بۆ فره‌نسایێ دكه‌ن.
ئێدوارد فیلیپ، سه‌رۆك وه‌زیرێ فره‌نسایێ ئیرۆ رۆژا یه‌كشه‌می 29/3/2020ێ د كۆنگره‌یه‌كێ رۆژنامه‌ڤانی دا گۆت: «ئه‌و پێشبینی دكه‌ن ژ یه‌ك هه‌تا 15 مه‌ها نیسانێ ژ بۆ فره‌نسایێ گه‌له‌ك دژوار بیت، فره‌نسا تووشی كریزه‌كێ بوویه كو یه‌كه‌مین جاره د دیرۆكێ دا راستی ره‌وشه‌كا وها دبیت».
فلیپ ده‌ست نیشان كر كو ب سه‌ده‌ما به‌لاڤبوونا ڤایرۆسا كۆرۆنایێ ئه‌و چاڤه‌رێیا ره‌وشه‌كه خه‌ته‌ر تر دكه‌ن، ژ به‌ر كو هه‌ر 3 رۆژان جاره‌كێ هه‌ژمارا تووشبوویان دوبه‌رانبه‌ر لێ دهێت و ترس هه‌یه فره‌نسا وه‌ك ئیتالیا و ئێسپانیا لێ بهێت.
هه‌تا نها ل فره‌نسایێ 2314 كه‌س ب ڤایرۆسا كۆرۆنا یا نوو (كۆڤید-19) جانێ خوه ژ ده‌ست دانه و هه‌ژمارا كه‌سێن تووشی ڤایرۆسێ بوون گه‌هشتییه 37575 كه‌سان، 6624 كه‌س ساخبوونه و ڤه‌گه‌رینه مالێن خوه.
