رایه‌داره‌كا مه‌زن یا په‌كه‌كێ كه‌ته به‌ر هێرشه‌كا تركیێ
رایه‌داره‌كا هه‌ری به‌رز یا پارتییا كاركه‌رێن كوردستانێ كو ل ئاستێ ئه‌ندامێن كۆمیته‌یا ناڤه‌ندی یا كه‌جه‌كێ یه، ل باشوورێ كوردستانێ، كه‌فته به‌ر هێرشه‌كا ده‌وله‌تا داگیركار یا تركیێ و ژیانا خوه ژ ده‌ست دا.
چاڤكانیێن پێگه‌ها «داركا مازی» ل باشوورێ كوردستانێ، ئه‌ڤرۆ رۆژا دوشه‌مبێ 30/3/2020ێ ئاشكرا كرن، هێزێن گرێدای ئارته‌شا ده‌وله‌تا داگیركار یا تركیێ و یێن ئیستخباراتێ «میت»ێ، هێرشه‌كا هه‌ڤبه‌ش ل چیایێ قه‌ندیلی پێگه‌ها سه‌ره‌كی یا سه‌رانێن په‌كه‌كێ ل باشوورێ كوردستانێ كرن، هێرشێ به‌رپرسیاره‌كا مه‌زن یا په‌كه‌كێ كره ئارمانج.
هه‌روه‌ها ده‌ست نیشان كرن، به‌رپرسیارا كو كه‌تییه به‌ر ڤێ هێرشێ ب «نه‌زیفه بیله‌ن» تێ ناس كرن و وه‌كه پێزانین ئاماژه دكه‌ن ئه‌و ل ئاستێ ئه‌ندامێن كۆمیته‌یا ناڤه‌ندی یا كۆما جڤاكێن كوردستانێ كه‌جه‌كێ یه، سه‌یوانا سیاسی یا په‌كه‌كێ.
«نه‌زیفه بیله‌ن» ل هه‌ر یه‌ك ژ وه‌لاتێن سووریێ و لوبنانێ ل سه‌ر ده‌ستێ عه‌بدوللا ئۆجالان، رێبه‌رێ مه‌حكووم كری یێ په‌كه‌كێ، مه‌شقا له‌شكری و سیاسی دیتییه، هه‌روه‌ها ژ دامه‌زرێنه‌رێن لقا ژنان یا رێخستنا په‌كه‌كێ یه.
«نه‌زیفه بیله‌ن» ب كۆد ناڤێن «هاجه‌ر هیلال و هاجه‌ر گۆیی» د ناڤا رێخستنا په‌كه‌كێ دا دهات ناس كرن و ئه‌ڤ دبیته یه‌كه‌مین جار به‌رپرسیاره‌كه په‌كه‌كێ ل ئاستا كۆمیتا ناڤه‌ندی یا كه‌جه‌كێ، ل باشوورێ كوردستانێ ژ ئالیێ ده‌وله‌تا داگیركار یا تركیێ تێ ئارمانج كرن.
