حه‌شدا شه‌عبی مریێن كۆرۆنایێ بن ئاخ دكه‌ت

حه‌شدا شه‌عبی مریێن كۆرۆنایێ بن ئاخ دكه‌ت

حكوومه‌تا ئیراقێ فه‌ده‌رال، ئیرۆ ده‌ست ئاڤێت بن ئاخ كرنا مریێن ڤایرۆسا كۆرۆنا یا نوو (كۆڤید-19) و ئه‌ڤ ئه‌ركه‌ ب میلیشیایێن حه‌شدا شه‌عبی سپارد.

ل گۆر راگه‌هاندنه‌كا ده‌سته‌یا برێڤه‌بر یا حه‌شدا شه‌عبی ل ئیراقێ، ئیرۆ رۆژا دوشه‌می 30/3/2020ێ لیوایا هه‌ژمار 2 ده‌ست ب بن ئاخ كرنا جه‌سه‌دێن 13 قوربانیێن ڤایرۆسا كۆرۆنایێ ل گۆرستانا ب ناڤێ «وادی سه‌لام» كرن.

هه‌روه‌ها ئه‌شكه‌ره‌ كر، چه‌كدارێن وان ل گۆر راسپارده‌یا «حه‌وزا نه‌جه‌فێ» و حكوومه‌تا فه‌ده‌رال، جهه‌ك ل بیابانێ ل دووری ناڤه‌ندا پارێزگه‌ها نه‌جه‌فێ، ژ بۆ بن ئاخ كرنا قوربانیێن ڤایرۆسێ كۆرۆنایێ هات ده‌ست نیشان كرن.

حه‌شدا شه‌عبی ژ بۆ كو ڤێ ئه‌ركێ ئه‌نجام بده‌ت، جهێ شووشتنا مرییان و هه‌روه‌ها جهێ نڤێژا ل سه‌ر مرییان، ل نێزی جهێ ڤه‌شارتنێ ل بیابانێ به‌رهه‌ڤ كرنه‌ و خوه‌ندكارێن «حه‌وزا نه‌جه‌فێ» نڤێژێ ل سه‌ر مریێن كۆرۆنایێ دكه‌ن.

ل گۆر پێزانینێن حكوومه‌تا فه‌ده‌رال یا ئیراقێ، هه‌یا نها پێتری 550 كه‌سان ل ئیراقێ تووشی ڤایرۆسا كۆرۆنایێ بوونه‌ و 42 كه‌سان ژیانا خوه‌ ژ ده‌ستدایه‌، هه‌روه‌ها 142 كه‌س ساخبوونه‌ و ڤه‌گه‌رینه‌ مالێن خوه‌.